इलाममा ट्रक र स्कुटर ठोक्किँदा २ जनाको मृत्यु

मंगलबारे– मेची राजमार्गअन्तर्गत इलाम नगरपालिका–९ भञ्ज्याङमा ट्रक र स्कुटर एकापसमा ठोक्किँदा दुई जनाको मृत्यु भएको छ।

शनिबार दिउँसो झापाबाट इलामतर्फ आउँदै गरेको प्रदेश १–०१–००१ ख ४१०१ नम्बरको ट्रक र विपरीत दिशाबाट गइरहेको प्रदेश १–०१–०१२ प ४८९९ नम्बरको स्कुटर आपसमा ठोक्किएका थिए। दुर्घटनामा स्कुटरमा सवार दुई जनाको मृत्यु भएको हो।

जिल्ला प्रहरी कार्यालयका अनुसार मृत्यु हुनेमा इलाम नगरपालिका–९, गोलबस्ती बस्ने २६ वर्षीय डेबिट थापा मगर र माईजोगमाई गाउँपालिका, नयाँबजार घर भई हाल इलाम–७, चोकबजारमा बस्ने १९ वर्षीय छेवाङ शेर्पा रहेका छन्।

कार्यालयका सूचना अधिकारी एवं प्रहरी नायब उपरीक्षक लक्ष्मी भण्डारीका अनुसार दुर्घटनालगत्तै उपचारका लागि जिल्ला अस्पताल लगिएकामा चिकित्सकले दुवै जनालाई मृत घोषणा गरेका थिए।

ट्रक चालक इलाम–५, बिब्ल्याटेका २५ वर्षीय रामप्रसाद श्रेष्ठलाई नियन्त्रणमा लिई अनुसन्धान भइरहेको सूचना अधिकारी भण्डारीले जानकारी दिए।