काठमाडौँ– नेपाल प्रहरीको केन्द्रीय अनुसन्धान ब्युरो (सीआईबी) ले ब्रेक सु र इलेक्ट्रोनिक्स सामानमा लुकाएर करिब ३२ क्विन्टल सुन तस्करी भएको निष्कर्ष निकालेको छ।
६० किलो सुन प्रकरणको दोस्रो चरणको अनुसन्धानका क्रममा ३० अर्ब ८२ करोड २२ लाख मूल्य बराबरको ३ हजार १९४ किलो सुन तस्करी भएको पाइएको हो। यस प्रकरणमा हालसम्म २० जनालाई पक्राउ गरिएको र २६ जना फरार रहेको सीआईबीले सोमबार पत्रकार सम्मेलन गरेर जानकारी दिएको छ।
ब्रेक सुलगायत विभिन्न सामानमा लुकाएर ल्याउने क्रममा २०८० साउन २ गते प्रहरीले त्रिभुवन अन्तर्राष्ट्रिय विमानस्थलबाट ६० किलो सुन बरामद गरेको थियो। यही समूहले ३१९४ किलो सुन तस्करी गरेको खुलेको सीआईबीले जनाएको छ। जसमा ब्रेक सुमा लुकाएर मात्र ३६२.७७८ किलो र इलेक्ट्रोनिक्स सामानमा २ हजार ८३१.८९ किलो तस्करी भएको पाइएको छ।
अवैध सुनको भुक्तानी प्रक्रियामा पेवेल नेपाल प्रालि र सजिलो पेमेन्ट सर्भिस प्रालिमार्फत अवैध सुनको भुक्तानी भएको सीआईबीले जनाएको छ। ५६ दिन लामो अनुसन्धानपछि आइतबार जिल्ला सरकारी वकिल कार्यालय काठमाडौँमा प्रतिवेदन बुझाइएको सीआईबीका एसपी होबिन्द्र बोगटीले जनाकारी दिए।