एनपीएल: लुम्बिनी र पोखरा तथा सुदूरपश्चिम र जनकपुर भिड्दै

काठमाडौँ– नेपाल प्रिमियर लिग (एनपीएल)मा शनिबार पनि दुई खेल हुँदै छन्। 

बिहान ११ः४५ बजे हुने पहिलो खेलमा लुम्बिनी लायन्स र पोखरा एभेन्जर्स भिड्दा अपराह्न ४ बजे साविक विजेता जनकपुर बोल्ट्स र उपविजेता सुदूरपश्चिम रोयल्स खेल्नेछन्।

रोहित पौडेलको कप्तानीमा रहेको लुम्बिनी चारमध्ये एक र कुशल भुर्तेलको कप्तानीमा रहेको पोखराले तीन खेलबाट एक खेल नै जितेको छ। 

लुम्बिनी अंक तालिकाको सातौँ र पोखरा छैटौँ स्थानमा छ। प्लेअफको सम्भावना जीवितै राख्न दुवै टोलीलाई यो खेल जित्नुपर्ने अवस्था छ।

यस्तै तीन खेल खेलेर अंकविहीन अवस्थामा रहेको जनकपुर आज पहिलो जित निकाल्ने लक्ष्यमा छ। जनकपुरले यो खेल नजिते प्लेअफ दौडबाट बाहिरिने सम्भावना छ।

 यता अपराजित रहेको सुदूरपश्चिम भने अंक तालिकाको पहिलो स्थानमा छ। आजको खेल जितेर सुदूरपश्चिम प्लेअफमा स्थान सुरक्षित गर्न चाहन्छ। 

यसका साथै गत संस्करणको फाइनलमा जनकपुरसँग हारेको बदलासमेत लिने दाउमा सुदूरपश्चिम रहनेछ।