इन्डोनेसियामा बाढीपहिरोबाट मृत्यु हुनेको संख्या १६४ पुग्यो

इन्डोनेसियाको सुमात्रा टापुमा मंगलबारको मनसुनी वर्षापछि आएको बाढी र पहिरोमा परी ज्यान गुमाउनेको संख्या १६४ पुगेको छ भने ७९ जना बेपत्ताको खोजी कार्य जारी छ।

बाढीले सडकमा क्षति पुगेको र आवश्यक उपकरणको अभावका कारण उद्धारकर्मीहरूले कठिनाइको सामना गरिरहेको इन्डोनेसियाका अधिकारीहरूले विज्ञप्तिमार्फत जानकारी दिएका छन्।

इन्डोनेसियाको राष्ट्रिय विपद् व्यवस्थापन एजेन्सी (बीएनपीबी)ले शुरूमा १७४ जनाको मृत्यु भएको रिपोर्ट गरे पनि हाल मृतकको संख्या १६४ मा संशोधन गरेको छ।

एजेन्सीका प्रमुख सुहारियान्तोले पत्रकार सम्मेलनमा उत्तरी सुमात्रा प्रान्तमा मृतकको संख्या ११६ पुगेको र उद्धारकर्ताहरूले टापुको पश्चिममा २३ जनाको शव बरामद गरेको जानकारी दिएका छन्।

उनले उद्धार टोलीहरूले उत्तरी सुमात्राका १२ शहर र जिल्लाहरूमा प्रभावित क्षेत्रहरूमा पुग्न कठिनाइको सामना गरिरहेको पुष्टि गरे। साथै, बाढीले १७ हजारभन्दा बढी घरहरू डुबानमा पर्दा लगभग २३ हजार मानिस विस्थापित भएको पनि उनले बताए।

उष्णकटिबन्धीय चक्रवात सिनियार्टले बढाएको मनसुनी वर्षाका कारण मंगलबार उत्तरी सुमात्राका नदीहरूले खतराको सतह नाघेका थिए। बाढीले धेरै पहाडी गाउँहरू बगाएको छ।

बाढीका कारण तीन हजार २०० भन्दा बढी सरकारी घर तथा भवनहरू पनि डुबानमा परेका छन्। फलस्वरूप, उक्त स्थानमा आश्रय लिइरहेका लगभग तीन हजार परिवारसमेत विस्थापित भएका छन्। बाढीले धान बाली, गाईवस्तु र सार्वजनिक सुविधाहरू नष्ट गरेपछि त्यहाँका मानिसहरूको जनजीवन असहज बनेको छ।