एनपीएलमा सुदूरपश्चिम रोयल्सको लगातार पाँचौँ जित

काठमाडौँ– दोस्रो संस्करणको नेपाल प्रिमियर लिग (एनपीएल) अन्तर्गत शनिबारको दोस्रो खेलमा जनकपुर बोल्ट्सविरुद्ध सुदूरपश्चिम रोयल्स ६ विकेटले विजयी भएको छ। अपराजित सुदूरपश्चिमको यो पाँचौँ जित हो।

सुदूरपश्चिमले पाँचमध्ये सबै खेलमा जित हासिल गर्दै अङ्क तालिकाको शीर्ष स्थानमा आफूलाई सुरक्षित राखेको छ। सुदूरपश्चिमले यसअघि काठमाडौँ गोर्खाजलाई २९ रनले, पोखरा एभेन्जर्सलाई १८ रनले, कर्णाली याक्सलाई ४५ रनले र लुम्बिनी लायन्सलाई ७ विकेटले पराजित गरेको थियो।

चार खेल खेलेको जनकपुरले अहिलेसम्म कुनै पनि जित निकाल्न सकेको छैन। पहिलो खेलमा काठमाडौँ गोर्खाजसँग ५ विकेटले पराजित भएको जनकपुर दोस्रो खेलमा विराटनगरसँग ९ रनले र तेस्रो खेलमा पोखरा एभेन्जर्ससँग २५ रनको हार बेहोरेको थियो।

त्रिवि क्रिकेट मैदानमा भएको खेलमा जनकपुरले दिएको १४६ रनको लक्ष्य सुदूरपश्चिमले १७.४ ओभरमा ४ विकेट गुमाउँदै १४८ रन बनाएर भेट्टायो। सुदूरपश्चिमका लागि इसान पाण्डेले अर्धशतकीय इनिङ्स खेले। उनले ३५ बलमा ८ चौका र १ छक्काको मद्दतमा ५६ रन जोडे।

विनोद भण्डारीले ४२ र हर्मीत सिंहले २५ रन जोडे भने कप्तान दीपेन्द्रसिंह ऐरी १० रनमा नटआउट रहे।

जनकपुरको बलिङतर्फ माज सदाकतले २ विकेट लिए। सञ्जय कृष्णमूर्ति र आदित्य महताको नाममा १/१ विकेट रह्यो।

त्यसअघि टस जितेर पहिला ब्याटिङ गर्ने निर्णय गरेको जनकपुरले निर्धारित २० ओभरमा ८ विकेटको नोक्सानीमा १४५ रन बनाएको थियो।

जनकपुरका लागि सञ्जय कृष्णमूर्तिले सर्वाधिक ५० रन बनाए। जान निकलो लोफ्टी ईटनले ३९ रनको योगदान गरे। त्यस्तै, आदित्य महताले १५, वेन पार्नेलले १४ तथा माज सदाकत १२ रन जोड्दा अरू खेलाडी दोहोरो अङ्कमा रन जोड्न सकेनन्।

बलिङमा सुदूरपश्चिमका अविनाश बोहराले ४, स्कट कुगेलेइनले ३ विकेट लिए भने दीपेन्द्र सिंह ऐरीका नाममा १ विकेट रह्यो।

शनिबार नै भएको पहिलो खेलमा लुम्बिनी लायन्सले पोखरा एभेन्जर्सलाई तीन विकेटले पराजित गरेको थियो।