धुलोमै खेल्छन् खेलाडी, धुलोमै बस्छन् दर्शक

बागलुङ– बागलुङ नगरपालिका–१ रामरेखास्थित बांगेचौर खेलमैदानमा मंसिर लागेपछि गतिविधि बढेको छ। विद्यालयस्तरीय साना खेल होस वा यहाँ आयोजना हुने ठूला राशिका खेल हुन् सबै यही मैदानमा हुन्छ।

हालै बागलुङ नगरपालिकाको तेस्रो मेयरकप प्रतियागिता यही मैदानमा भयो। तत्कालै बागलुङ नगरपालिकास्तरीय राष्ट्रपति रनिङ शिल्डदेखि जिल्लास्तरीय राष्ट्रपति रनिङ शिल्डसम्म यही खेल मैदान आयोजना गर्न थालिएको छ।

यसपटक गण्डकी प्रदेशस्तरीय राष्ट्रपति रनिङ शिल्ड प्रतियोगिताका केही खेल यही खेल मैदानमा हुने तयारी छ। तर यसरी उत्साह पूर्णरूपमा प्रतियोगिता आयोजना भइरहेको मैदान भने खेलाडी र दर्शकमैत्री छैन। बर्खामा हिलाम्मे खेलमैदान हिउँदमा धुलाम्मे हुन्छ। न हरियाली छ न व्यवस्थित प्यारापिट। खेलाडी धुलोमै खेल्छन्, दर्शक धुरोमै बसेर हेर्न बाध्य भएका छन्। 

खेल अगाडि छर्केको पानी क्षणभरमै सुक्ने गरेको छ भने धुलो उडेर खेल प्रभावित हुने गरेको खेलाडीको गुनासो छ। जिल्लाकै ठूलो खेलमैदानका रूपमा रहेको बांगेचौर खेलमैदान पूर्वाधारको अभावका बीच खेल सञ्चालन गर्न बाध्य रहँदै आएको छ। बागलुङ नगरपालिकाले तीन लाख ३३ हजार रुपैयाँ पुरस्कार राशिको तेस्रो मेयरकप मंसिर १४ देखि १८ गतेसम्म सम्पन्न भएको थियो।

सयौँ दर्शकको बीचमा सञ्चालनमा आएको खेलमा खेलाडीको उत्साह र दर्शकको हौसलामा कमी नभएको मेयरकपमा दर्शकहरू मैदानको भित्ता, रूख र चौतारीमा बसेर  हेर्न बाध्य भएका थिए। लेबल नमिलेको मैदानमा धुलो उडेका कारण खेलाडीलाई खेल खेल्न सास्ती भए पनि सबै कुरा बिर्सेर खेलाडी गोल गर्न मात्रै केन्द्रित हुने मेयर कपको उपाधि चुमेका कप्तान निसान थापा बताउँछन्। 

“खेलाडीका लागि समथर हरियाली मैदान भए कति सहज हुन्थ्यो, मैदानमा धुलोको हुँदैन गोल गर्न हाम्रो ध्यान केन्द्रित हुन्छ, तर खेल सकिएपछि धुलोका कारण श्वासप्रश्वासमा समस्या देखिने, आँखा पोल्ने हुन्छ”, थापाले भने, “दर्शक धुलोमै बसेर खेल हेरेका हुन्छन्, दमकलको पानीले धुलो मारे पनि केही छिनमै धुलो उडिहाल्छ, भनेको ठाउँमा बल नजाँदा कतिपय गोल गर्न नसकिएको उदाहरण छ, कम्तीमा मैदान समथर र हरियाली मात्रै भए खेलाडीलाई ठूलो राहत हुन्थ्यो।”

बांगेचौरलाई रंगाशाला बनाउने योजना ‘डीपीआर’मै थन्किएको छ। थापाले खेलमैदानमा पानी नहाली खेल्ने हो भने धुलोले खेलाडी नै नचिनिने अवस्था रहेको सुनाए।

खेलमैदानमा खानेपानी, शौचालय र पोसाक परिवर्तन गर्ने कोठा छैन। बागलुङ नगरपालिकाका नगरप्रमुख वसन्तकुमार श्रेष्ठले बांगेचौर खेलमैदान जिल्लाकै गहना भएको बताउँदै बांगेचौरको स्तरोन्नतिका सपना अझै पूरा गर्न नसकिएको बताए। उनले खेलमैदान सामुदायिक वनसँग जोडिएकाले पूर्वाधार निर्माण गर्न समस्या भएको बताए। यसअघि रंगाशाला बनाउन संघीय सरकारबाट आएको आठ करोड रुपैयाँ बजेट रूख काट्न नसक्दा फिर्ता भएको उनको भनाइ छ।