बागलुङको स्वास्थ्य चौकी भवन ३ वर्षदेखि अलपत्र

गलकोट– एक वर्षभित्र सक्नेगरी निर्माण थालिएको बागलुङ नगरपालिका–१४ स्थित नारायणस्थान स्वास्थ्य चौकीको भवन तीन वर्ष बित्दासमेत सम्पन्न हुन सकेको छैन। 

भवन नबन्दा साँघुरो भवनबाट सेवा प्रवाह हुँदै आएको छ। निर्माण व्यवसायीको लापरबाही र ढिलासुस्तीका कारण तीन वर्ष बित्दासमेत भवन निर्माण अधुरै छ। भवन ढलान र पर्खालको काम मात्रै सकिएको छ। 

२०७९ माघ ६ गते एक वर्षमा सक्ने गरी निर्माण थालेको भवन अझै सम्पन्न हुन नसकेको बागलुङ नगरपालिकाका इन्जिनियर सोबिन घर्तीले जानकारी दिए। उनका अनुसार, दुई पटक थपेको म्यादसमेत अहिले सकिएकाले भवन निर्माणमा अझै अन्योल छाएको छ। 

“भवनमा प्लास्टरको काम अझै सकिएको छैन, तिहार यता कामदार भवनमा देखिएका छैनन्,” घर्तीले भने, “भवन समयमा नबन्दा ठेक्का तोड्ने वा म्याद थप्ने विषयमा छलफल भइरहेको छ, नगरपालिकाले निर्माण व्यवसायीलाई धरौटी जफत गरेर भएपनि सम्पन्न गर्ने योजनामा छ।”

भवन निर्माणका लागि दोस्रो पटक थप गरिएको म्यादसमेत कात्तिक मसान्तमा सकिएको छ। निर्माण व्यवसायी डीएनप्रसाद जेभीसँग १ करोड ८२ लाख रुपैयाँमा ठेक्का सम्झौता भएको थियो। निर्माण व्यवसायीले थोरै कामदार परिचालन गर्ने, सम्पर्कविहीन हुँदा भवन समयमै बन्न नसकेको हो। 

नगरपालिकाकै नमूना स्वास्थ्य चौकीको रूपमा रहेको नारायणस्थान स्वास्थ्य चौकी अहिले साँघुरो भवनबाट सेवा प्रवाह भइरहेको स्वास्थ्य चौकीका प्रमुख ऋषिराम शर्माले जानकारी दिए। 

स्थानीयले चन्दा उठाएर २१ लाख रुपैयाँ संकलन गरी स्वास्थ्य चौकीको नाममा जग्गा खरिद गरेर भवन निर्माण थालिएको थियो।