नेपाल यू१९ एशिया कपका लागि छनोट

काठमाडौँ– नेपाली यू१९ टोली आगामी एसीसी यू१९ एशिया कपका लागि छनोट भएको छ। यूएईमा जारी एशिया कप छनोटको शनिबारको सेमिफाइनल खेलमा नेपालले मलेसियालाई ९ विकेटको फराकिलो अन्तरले पराजित गर्दै एशिया कपमा स्थान सुरक्षित गरेको हो।

संयुक्त अरब इमिरेट्स (यूएई)को अजमान मैदानमा भएको खेलमा मलेसियाले दिएको ५२ रनको झिनो लक्ष्य नेपालले केवल ७.५ ओभरमा एक विकेटको क्षतिमा सहजै पूरा गर्‍यो।

नेपालका लागि वंश क्षेत्रीले अविजित २३ रन तथा निश्चल क्षेत्रीले अविजित १५ रनको योगदान दिएका थिए। मलेसियाका मोहम्मद अक्रामले एक विकेट हात पारेका थिए।

यसअघि, टस हारेर पहिला ब्याटिङ गरेको मलेसिया १७.२ ओभरमा ५१ रनमै अलआउट भएको थियो। उसका लागि हमजाह पङ्गीले १३ रन र मुहम्मद फतुल मुइनले ११ रन जोडे पनि अन्य कुनै पनि ब्याटरले दोहोरो अंकको रन बनाउन सकेनन्।

नेपाली टोलीको जितमा बलिङको प्रदर्शन महत्त्वपूर्ण रह्यो। नेपालका लागि नितिस कुमार पटेलले चार विकेट लिएर मलेसियाको ब्याटिङ लाइनअप ध्वस्त पारे। यस्तै, चन्दन रामले तीन विकेट लिए। कप्तान अशोक धामी, रोशन विश्वकर्मा र अपराजित पौडेलले एक/एक विकेट हात पारे।

कुल १४ टोलीको सहभागिता रहेको यो छनोट प्रतियोगिताबाट शीर्ष तीन टोली आगामी एसीसी यू१९ एसिया कपमा छनोट हुनेछन्। आगामी यू-१९ एशिया कप डिसेम्बरमा यूएईमै आयोजना हुनेछ।