लिबियामा विनाशकारी बाढी: नेपाली शान्ति सेना सुरक्षित

काठमाडौँ– संयुक्त राष्ट्रसंघको आह्वानमा लिबियामा तैनाथ सबै नेपाली शान्ति सैनिक सुरक्षित रहेका छन्। पूर्वी लिबियामा डानिएल आँधीका कारण आएको विनाशकारी बाढीमा परी २० हजारभन्दा बढी मानिसको मृत्यु भएको अनुमान गरिएको छ। 

घटनास्थलबाट नेपाली शान्ति सैनिकको गार्ड युनिटको शिविर ११३ किलोमिटरको  दूरीमा रहेकाले कुनै क्षति नभएको र सबै सुरक्षित रहेको सैनिक प्रवक्ता कृष्णप्रसाद भण्डारीले बताए। भारी वर्षापछि दुईवटा बाँध फुटेकाले तटीय सहर देर्नाको एक चौथाइ क्षेत्र बाढीले बगाएको छ । नेपाली जनता र सेनाका तर्फबाट बाढीपीडित जनतालाई सहयोगका लागि त्यहाँ तैनाथ नेपाली शान्ति सैनिकले केही औषधि र चिकित्सा सामग्री पठाएको छ। ती सामग्री संयुक्त राष्ट्रसङ्घ महासचिवका विशेष प्रतिनिधि र सहायक महासचिवमार्फत हस्तान्तरण गरिने छ प्रवक्ता भण्डारीले बताए।

बाढीबाट सडक सम्पर्कसमेत विच्छेद भएकाले हवाई अनुगमनबाट लिबियाको पूर्वी क्षेत्रमा भएको क्षतिको प्रारम्भिक अनुमान लिइएको हो । डानिएल नामक आँधीका कारण भएको वर्षापछि बाँध फुटेको र डेर्नालगायत नजिकका सहरमा ठूलो क्षति भएको छ।