पाँच प्रदेशका पहाडी भू–भागमा वर्षाको सम्भावना

काठमाडौँ– देशभरकाे मौसम सामान्य बद्ली भइ सोमबार धेरैजसो पहाडी क्षेत्रमा वर्षाको सम्भावना रहेको मौसम पूर्वानुमान महाशाखाले जनाएको छ। 

लुम्बिनी, कर्णाली र सुदूरपश्चिम प्रदेशसहित बागमती र गण्डकी प्रदेशका पहाडी भू–भागका केही स्थानहरूमा र देशका बाँकी भू–भागका थोरै स्थानहरूमा मेघगर्जन/चट्याङसहित हल्कादेखि मध्यम वर्षाको सम्भावना रहेको छ। यस्तै, सोमबार राति देशभर आंशिकदेखि सामान्य बद्ली रहने मौसम पूर्वानुमान महाशाखाले जनाएको छ। सुदूर–पश्चिम प्रदेशसहित पहाडी भू–भागका थोरै स्थानहरूमा र बाँकी भू–भागको एक/दुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ। 

हाल मनसुनको न्यूनचापीय रेखा सरदर स्थानको दक्षिणतिर अवस्थित छ। साथै नेपालमा हाल राजस्थानको दक्षिणपूर्वि भू–भाग र मध्य प्रदेशको पश्चिमी भू–भाग आसपासको क्षेत्रमा रहेको न्यूनचापीय प्रणालीको समेत आंशिक प्रभाव रहेको छ।