अरुण तेस्रो आयोजनामा मुआब्जा विवाद, ३ सातादेखि निर्माण ठप्प

अरुण तेस्रो प्रवेशमार्गको छ्याङकुटी–दिदिङ पुखुवा सडकखण्डको मुआब्जा माग गर्दै स्थानीय आन्दोलित भएका छन्। उनीहरूको अवरोधका कारण विद्युत्‌गृहस्थल र प्रवेशमार्गको काम ठप्प छ। 

उकालो

बुधबार, ३ असोज, २०८०

अरुण तेस्रो आयोजनामा मुआब्जा विवाद, ३ सातादेखि निर्माण ठप्प 

संखुवासभा– संखुवासभामा निर्माणाधीन ९०० मेगावाट क्षमताको अरुण तेस्रो जलविद्युत् परियोजना निर्माण तीन सातादेखि ठप्प छ। 

अरुण तेस्रो प्रवेशमार्गको छ्याङकुटी–दिदिङ पुखुवा सडकखण्डको मुआब्जा माग गर्दै स्थानीयले काम ठप्प पारेका हुन्। स्थानीयको अवरोधका कारण अरुण तेस्रोको विद्युत्‌गृहस्थल र प्रवेशमार्गको काम ठप्प छ। 

अरुण प्रवेशमार्ग संघर्ष समितिका संयोजक जनीकुमार राईले सरकारले माग सुनुवाइ नगरेपछि आन्दोलनमा उत्रिनुपरेको बताए। स्थानीयले प्रवेशमार्गको छ्याङकुटी–दिदिङ पुखुवा सडकखण्डको २४ किलोमिटर क्षेत्रको मुआब्जा माग गर्दै आएका  छन्। 

छ्याङकुटीबाट पुखुवासम्म ४५४ रोपनी जग्गाको मुआब्जा प्राप्त गर्न बाँकी छ। मुआब्जा रकम जिल्ला प्रसासन कार्यालयको खातामा नआएसम्म आन्दोलन जारी रहने पीडितको भनाइ छ। उनीहरू मुआब्जा माग गर्दै विगत सात वर्षदेखि आन्दोलित छन्। 

अरुण तेस्रो निर्माण गरिरहेको भारतीय सतलज जलविद्युत् निगमसँगको आयोजना विकास सम्झौता (पीडीए)मा स्थानीयको अवरोधका कारण काम रोकिए नेपाल सरकारले दैनिक आठ करोड क्षतिपूर्ति बेहोर्नुपर्ने सर्त उल्लेख छ। 

छुट मुआब्जा निर्धारण समितिले गत वैशाख २६ गते छयाङकुटी–दिदिङ सडकखण्डको प्रतिरोपनी ११ लाख ७५ हजार दिने निर्णय गरेको थियो। तर हालसम्म प्रभावितले मुआब्जा पाएका छैनन्। आयोजनाबाट नेपालले २१.९ प्रतिशत (१९७ मेगावाट) बिजुली निःशुल्क पाउने बताइएको छ। 

आयोजना बनाउन एक खर्ब १५ अर्ब लाग्ने अनुमान गरिएको छ। अरुण तेस्रो विद्युत् आयोजनामा नेपाली र भारतीयसहित तीन हजार बढी मजदुर कार्यरत छन्। 

 

प्रतिक्रिया दिनुहोस !