शिक्षण संस्थालाई अशान्त हुन नदिन सरकार गम्भीर छ: गृहमन्त्री

काठमाडौँ– उपप्रधान एवं गृहमन्त्री नारायणकाजी श्रेष्ठले शिक्षण संस्थाहरूलाई अशान्त हुन नदिने कुरामा सरकार गम्भीर रहेको बताएका छन्। 

बिहीबार राज्य व्यवस्था तथा सुशासन समितिको बैठकमा गृहमन्त्री श्रेष्ठले सरकारले शिक्षा र स्वास्थ्यलाई प्राथमिकतामा राखेर काम गरेको बताए।

“शिक्षा र स्वास्थ्यको क्षेत्रमा सरकारले अलि बढी नै प्राथमिकता दिएको छ,” उनले भने, “कुनै पनि शिक्षण संस्थालाई अशान्त हुन नदिन र शान्तिपूर्ण वातावरण स्थापित गर्ने कुरामा हामी गम्भीर छौँ।”

स्वास्थ्य संस्थाको हकमा पनि ऐनलाई प्रभावकारी रूपमा अगाडि बढाउने, कार्यान्वयन गर्ने र चिकित्सकले जिम्मेवारीपूर्वक काम गर्ने वातावरण निर्माण गर्ने उनको प्रतिबद्धता थियो।

सरकार र गृह मन्त्रालयसँग सम्बन्धित विषयमा सबैसँग छलफल गरेर अगाडि बढ्ने गृहमन्त्री श्रेष्ठको भनाइ छ।