आन्दोलनरत शिक्षकका जायज माग अविलम्ब सम्बोधन गर्न एमालेको माग

काठमाडौँ– प्रमुख प्रतिपक्षी दल नेकपा एमालेले आन्दोलनरत शिक्षकहरूका जायज माग सम्बोधन गर्न सरकारसँग माग गरेको छ। 

एमाले सचेतक महेश बर्तौला नेतृत्वको टोलीले बिहीबार शिक्षा, विज्ञान तथा प्रविधिमन्त्री अशोककुमार राईलाई ज्ञापनपत्र बुझाउँदै शिक्षक महासंघका पदाधिकारीसँग वार्ता गरी समस्याको निकास निकाल्दै तत्काल विद्यालय खोल्ने वातावरण बनाउन आग्रह गरेको हो। 

बर्तौलाले तत्काल विद्यालय खोल्ने वातावरण बनाउन शिक्षामन्त्रीसमक्ष आग्रह गरेको बताए। उनले सरकारले आन्दोलनरत शिक्षक महासंघका पदाधिकारीसँग वार्ता गरेर विद्यालय खोल्ने वातावरणको सुनिश्चित गर्न आग्रह गरेको जानकारी दिए। उनले शिक्षकको आन्दोलनमा भएको प्रहरी हस्तक्षेपप्रति ध्यानाकर्षण गराएको बताए।

“शिक्षकले गरिरहेको आन्दोलनमा जुन तवरबाट प्रहरी हस्तक्षेप भइरहेको छ, यसप्रति पनि सरकारको गम्भीर ध्यानाकर्षण गराएका छौँ। यी यस्ता विषयलाई अन्त्य गरेर विद्यालय सञ्चालन हुनुपर्‍यो। शिक्षकहरूका कतिपय जायज मागहरू अविलम्ब सम्बोधन गर्नका लागि र विधेयकको अंग बनाएर अगाडि बढ्नको लागि सरकारलाई हामीले औपचारिक आग्रह गर्‍यौँ। 

एमाले सचेतक बर्तौलाले सरकारले छिटोभन्दा छिटो आन्दोलनरत शिक्षकसँग वार्ता गरी समस्याको निकास खोज्नुपर्ने बताए। उनले जवाफमा शिक्षामन्त्री राईले शिक्षकका माग सम्बोधनका लागि सकारात्मक ढंगले पहल गरिरहेको बताएको जानकारी दिए।