एमाले कर्णाली प्रदेश अधिवेशनः शाही र सिंहले लिए उम्मेदवारी फिर्ता

सुर्खेत– नेकपा एमाले कर्णाली प्रदेश अध्यक्ष पदका लागि उम्मेदवारी दिएका राजबहादुर शाही र प्रेमबहादुर सिंहले आफ्नो मनोनयन फिर्ता लिएका छन्। 

शनिबार विज्ञप्ति जारी गर्दै शाहीले पार्टीको केन्द्रीय नेतृत्वले अमुक व्यक्तिलाई समर्थन लिएको सूचना पाएपछि उम्मेदवारी फिर्ता लिएको जानकारी दिए। 

“केन्द्रीय नेतृत्वको चाहनाविपरीत निर्वाचित भएर पनि पार्टी निर्माणमा सकारात्मक योगदान नहुने आदि सम्भावनाहरूलाई ध्यान दिँदै आफ्नो उम्मेदवारी फिर्ता लिने निर्णयमा पुगेँ,” उनले लेखेका छन्।

उनले पहिलो पटक भएको प्रदेशको अधिवेशनबाट अध्यक्ष हुने उत्कट इच्छासहित आफूले मनोनयन दर्ता गरेको बताएका छन्। 

त्यस्तै, उम्मेदवारी फिर्ता लिन तोकिएको समयको अन्तिममा प्रेमबहादुर सिंहले पनि उम्मेदवारी फिर्ता लिएका हुन्।