कुशल मल्लकी आमा भन्छिन्– साग केलाउँदै छोराको खेल हेरेँ, देशको नाम राख्यो खुशी छु

लुम्बिनी– एशियाली खेलकुदअन्तर्गत नेपाल र मंगोलियालियाबीच खेल चलिरहँदा क्रिकेटर कुशल मल्लकी आमा शर्मिला काठमाडौँमा थिइन्। 

नेपाली टोलीले मंगोलियालाई २७३ रनको भारी अन्तरले पराजित गरेपछि उनमा खुशीको सीमा नै रहेन। राष्ट्रिय तथा अन्तर्राष्ट्रिय प्रतियोगितामा कुशलले हरेक खेल खेल्दा आमा शर्मिलाले प्रायः छोराको खेल नहेर्ने भए पनि यसपटक भने पूरै खेल हेरेकी थिइन्। कतै छिट्टै नै खेलबाट बाहिरिने हो कि भन्ने चिन्ताले टिममा अन्य खेलाडीको प्रस्तुति हेरे पनि कुशलको खेल प्रायः नहेर्ने गरेको उनी बताउँछिन्। तर यसपटक भने शुरूदेखि अन्तिमसम्म नै हेरेको र कुशलले निकै उत्कृष्ट खेलेको देख्दा खुशी लागेको उनको भनाइ छ। 

बुटवल उपमहानगरपालिका–११ देवीनगरका स्थायी निवासी कुशलको परिवार हाल काठमाडौँ चन्द्रागिरि नगरपालिका माता तीर्थमा बसोबास गर्दै आएको छ। “म छोराको खेल कहिलेकाहीँ मात्र हेर्छु, ऊ सधैँ आक्रामक खेल्छ त्यसैले छिट्टै आउट हुने हो कि भन्ने चिन्ता लाग्छ,” उनले भनिन्, “अस्तिको खेल त घरमा साग केलाउँदै पूरै हेरेँ निकै उत्कृष्ट प्रस्तुति पो देखायो त, अनि खुशीको कुनै सीमा नै रहेन।”

कुशलका पिता रोमन्त वैदेशिक रोजगारीमा छन्। परिवारका एकमात्र सन्तान कुशलको प्रदर्शनले विदेशमा रहेका पिता रोमन्त झनै खुशी छन्। उनी खुशी हुनुको कारण आफैँ खेलाडी भएकाले पनि हो। रोमन्त तेक्वान्दोका ब्याकबेल्ट प्राप्त खेलाडी हुन्।

कुशलका क्रिकेट गुरु नेपाली राष्ट्रिय क्रिकेट टिमका पूर्वखेलाडी तथा प्रशिक्षक शक्ति गौचन हुन्। जुन बेला कुशल होराइजन स्कुलमा अध्ययन गर्न आए त्यसबेलादेखि नै उनले क्रिकेटको योग्य प्रशिक्षक गौचनको साथ पाए। कुशलको क्रिकेटको विकासमा गौचनको महत्त्वपूर्ण योगदान रहेको आमा शर्मिला बताउँछिन्। “गौचन सरले घरमा नै आएर हामीलाई समेत बाबुको क्रिकेटमा राम्रो सम्भावना छ, अगाडि बढ्न सक्छ भन्नुहुन्थ्यो,” उनले भनिन्, “अहिलेको अवस्थामा पुर्‍याउनमा गौचन सरले नै धेरै गर्नुभएको हो।”

कुशललाई १२ वर्षको उमेरदेखि नै प्रशिक्षित गर्दै आएका राष्ट्रिय प्रशिक्षक गौचनले क्रिकेटप्रतिको लगाव र मेहनतले नै अहिले यो अवस्थामा आएको बताए। क्रिकेट सिक्दै जाँदा उनीमा देखिएको ‘पावर हिटिङ’ र ‘लेफ्टहेन्डेड’कै कारण खेललाई थप क्षमता प्रदर्शन गर्न सकेको उनको भनाइ छ। “क्रिकेट खेल हो कहिले उतारचढाव भइरहन्छ, उसको खेलप्रतिको लगाव र निरन्तरताको परिणाम अहिले देखिन थालेको मान्न सकिन्छ,” गौचनले भने, “खेलमा थप मेहनत, लगानी गर्दै जाने हो भने अझै राम्रो परिणाम आउन सक्छ, उसको क्रिकेटको भविष्य राम्रो छ।”

प्रतियोगितामा कुशलले जम्मा ३४ बलमा शतक पूरा गर्दै टी–२० अन्तर्राष्ट्रियमा क्रिकेटमा सबैभन्दा छिटो शतक बनाउने खेलाडीको कीर्तिमान कायम गरेका हुन्। उमेरले भर्खर १९ वर्ष पुगेका उनी नेपाली क्रिकेटमा बायाँहाते आक्रामक ब्याटर हुन्। उनको ब्याटिङ गर्दा छक्का वा चौका हुने सम्भावना प्रशस्त बन्ने गर्छ।

कुशल क्रिकेट खेलप्रति सानैदेखि रुचि राख्थे। प्रारम्भिक शिक्षा बुटवलको इडन बोर्डिङ स्कुलबाट शुरू भएको हो। कक्षा १२ सम्मको अध्ययन बुटवलकै न्यु होराइजन स्कुलमा भएको हो। “खेलौनाको ब्याट र टीटीबल बोकेर खाली चौरमा क्रिकेट भन्दै दौडिन्थ्यो, छिमेकीका घरका झ्यालमा बलले लागेर सिसा फुटेर कयौँपटक गाली खाएको अहिले पनि सम्झना आउँछ,” शर्मिलाले भनिन्, “हामी परिवारबाट भने कहिल्यै खेल्न रोक लगाएनौँ बरु क्रिकेटसँगै पढाइ पनि सँगसँगै अगाडि बढाए हुन्थ्यो भन्ने लाग्थ्यो।”

एक दिवसीय अन्तर्राष्ट्रिय खेलमा सर्वाधिक कम उमेरमा अर्धशतक बनाउने खेलाडी बनेका कुशलले अहिले फेरि नयाँ कीर्तिमान बनाएका छन्। उनले सन् २०२० मा आईसीसी विश्वकप लिग–२ मा अमेरिकाविरुद्ध डेब्यु खेलमा अर्धशतक बनाउँदै विश्व कीर्तिमान बनाएका थिए। मल्लले १५ वर्ष ३४० दिनमा अर्धशतक बनाउँदै विश्व कीर्तिमान बनाएका थिए। अहिले उनले ५० बलमा आठ चौका र १२ छक्कासहित अविजित १३७ रन बनाएर कीर्तिमान कायम गरे। 

अन्तर्राष्ट्रिय क्रिकेटमा विरलै प्राप्त गर्ने सफलतासहितको कीर्तिमान बनाएपछि विश्वभर यसको चर्चा चलिरहेको छ। क्रिकेट खेलको २७ वर्षे इतिहासमा नेपालले बनाएका विश्व कीर्तिमानको अहिले खुबै चर्चा भएको छ।