नेपालगन्जमा सर्वपक्षीय बैठकको निर्णयः सामाजिक सद्भाव बिथोल्ने गतिविधि गर्नेलाई कारबाही गरिने

काठमाडौँ– बाँकेकाे सदरमुकाम नेपालगन्जमा सामाजिक सद्भाव बिथाेल्ने गतिविधि बढ्दै गएपछि बसेको सर्वपक्षीय बैठकले त्यस्ता गतिविधि गर्नेहरूलाई कारबाही गर्ने निर्णय गरेको छ। 

बुधबार बसेको सर्वदलीय, सर्वपक्षीय बैठकले सामाजिक सञ्जाल तथा अन्य कुनै पनि माध्यमबाट सामाजिक सद्भाव बिथोल्ने, धार्मिक विद्वेष फैलाउने तथा कसैको धार्मिक आस्थामा आँच आउने जस्ता कानूनविपरीत कार्य गर्नेलाई कारबाही गर्ने निर्णय गरेको हो। यस्तै, शान्ति सुरक्षाको वर्तमान अवस्थालाई पूर्णरूपमा सामान्य अवस्थामा ल्याउने र नेपालगन्ज क्षेत्रमा हाल जारी रहेको कर्फ्युलाई घटाउँदै लैजाने निर्णय भएको छ। 

नेपालगन्जमा सामाजिक सद्भाव कायम राखिराख्न प्रतिबद्धता जनाउँदै सद्भाव र्‍याली निकाल्ने निर्णय पनि भएको छ। नेपालगन्जमा हिन्दू र मुस्लिम समुदायबीच उत्पन्न भएको तनावका कारण गएको मंगलबारदेखि कर्फ्यु लगाइएको छ।