सुदूरपश्चिम र कर्णालीबाट मनसुन बाहिरियो, कोशी र बागमतीमा हल्का वर्षाको सम्भावना

काठमाडौँ– यस वर्षको मनसुन सुदूरपश्चिम र कर्णालीको पश्चिम भूभागबाट बाहिरिएको छ। 

बाँकी स्थानबाट पनि केही दिनमा मनसुन बाहिरिने मौसम पूर्वानुमान महाशाखाले जनाएको छ। नेपालमा हाल भारतको पश्चिम बंगाल र बंगलादेश आसपास रहेको न्यूनचापीय क्षेत्रको प्रभाव रहेको छ। 

जसका कारण दिउँसो कोशी, बागमती र गण्डकीका थोरै स्थानमा हल्का वर्षा हुनेछ।

बाँकी प्रदेशमा आंशिक बदलीदेखि सामान्यतया मौसम सफा रहनेछ। राति कोशी, मधेश, बागमती र गण्डकीमा आंशिकदेखि सामान्य बदली रहनेछ। 

कोशी, मधेश, बागमती र गण्डकीका थोरै र बाँकी प्रदेशका केही स्थानमा मेघगर्जन र चट्याङसहित हल्का वर्षा हुने महाशाखाले जनाएको छ।