सिक्किम पहिरोमा बेपत्ता भएका ५ नेपाली परिवारको सम्पर्कमा

इलाम– भारतको सिक्किममा गएको बाढी पहिरोपछि सम्पर्कविहीन भएका इलामका पाँच जना परिवारको सम्पर्कमा आएका छन्। 

इलाम नगरपालिका–९ का सेनबहादुर कार्की, कुमार बस्नेत, नरमाया बस्नेत, खुशी कार्की र लाक्पा लामा ११ दिनपछि परिवारको सम्पर्कमा आएको इलामका सहायक प्रमुख जिल्ला अधिकारी ध्रुवप्रसाद कोइरालाले जानकारी दिए।

उनका अनुसार पाँचै जना स्वदेश फर्किँदै छन्। टिस्टा नदीमा बाढी आएपछि नेपाली बसोबास गर्ने स्थल तथा आसपासमा विद्युत्‌समेत कटौती भएको थियो।

विद्युत् नहुँदा टेलिफोन तथा अन्य सञ्चारका साधनसमेत अवरुद्ध भएकाले सम्पर्क स्थापित हुन नसकेको जनाइएको छ।

उनीहरू असोज १६ गतेदेखि नै सम्पर्कविहीन भएका थिए।