आजदेखि नयाँ नोट साट्न पाइने, एकैपटक साढे १८ हजार दिने राष्ट्रबैंकको तयारी

काठमाडौँ– नेपाल राष्ट्रबैंकले सोमबारदेखि नयाँ नोट साट्न शुरू गर्ने भएको छ। दशैँ, तिहार र छठ पर्वलाई लक्षित गर्दै राष्ट्रबैंकले सोमबारदेखि नयाँ नोट साट्ने प्रबन्ध गरेको हो।

राष्ट्रबैंकले हरेक वर्ष चाडपर्वको समयमा नयाँ नोट सटहीको सुविधा दिँदै आएको छ। ५, १०, २०, ५० र सय रुपैयाँका नयाँ नोट एक जनालाई १८ हजार ५०० सम्म सटहीको व्यवस्था मिलाइएको राष्ट्रबैंकले जनाएको छ।

काठमाडौँ उपत्यकाभित्र राष्ट्रबैंक अन्तर्गतको मुद्रा व्यवस्थापन विभाग र विभिन्न वाणिज्य बैंकका शाखामार्फत नयाँ नोट सटही गर्न सकिनेछ। उपत्यका बाहिर भने राष्ट्रबैंकको प्रदेश कार्यालय वा वाणिज्य बैंकका शाखाबाट नोट साट्न सकिने राष्ट्रबैंकले जनाएको छ।