गोरखाबाट काठमाडौँ पठाइयो फूलपाती, हनुमानढोका दरबारमा भित्र्याइने

गोरखा– गोरखा दरबारस्थित दशैँघरबाट काठमाडौँको हनुमानढोका दरबारका लागि फूलपातीसहितको डोली पठाइएको छ।

विधिपूर्वक पूजाअर्चना गरी दरबारका सुसारेले फूलपातीसहितको डोली पठाएका हुन्। डोली सरकारी गाडीमा राखेर पठाइएको गोरखा दरबारका मूलपुरोहित शारदाप्रसाद भट्टराईले जानकारी दिए।

गोरखाबाट पठाइएको फूलपाती साँझ हर्षबढाइँका साथ हनुमानढोका दरबारमा भित्र्याउने प्रचलन छ। गोरखा दरबारको दशैँघरमा पनि आजै साँझ फूलपाती भित्र्याइन्छ।

तत्कालीन गोरखाका राजा पृथ्वीनारायण शाहले काठमाडौँको हनुमानढोका दरबारबाट राजकाज शुरू गरेदेखि बर्सेनि बडादशैँको सातौँ दिन गोरखा दरबारको दशैँघरबाट फूलपातीसहितको डोली हनुमानढोका दरबारमा पुर्‍याएर भित्र्याउने प्रचलन रहँदै आएको उनले बताए। 

गोरखा दरबारको दशैँघरबाट फूलपातीको डोली दरबारका सुसारेहरूले बोकेर ल्याई गाडीमा राखेर पठाइएको हो।

दरबारस्थित दशैँघरबाट बाजागाजासहित र्‍याली निकाली गोरखाबाट फूलपातीको बिदाइ गरिएको छ।