दुर्गा मूर्ति विसर्जनका दिन बुधबार बाँकेमा रक्सी बिक्री तथा उपभोगमा प्रतिबन्ध

जिल्लाको समग्र शान्ति सुरक्षा, सुव्यवस्था र सार्वजनिक हितलाई ध्यानमा राखेर एक दिनका लागि पूर्णरूपमा जाँडरक्सी खान र बेच्न प्रतिबन्ध गरेको कार्यालयले जनाएको छ।

उकालो

मंगलबार, ७ कात्तिक, २०८०

दुर्गा मूर्ति विसर्जनका दिन बुधबार बाँकेमा रक्सी बिक्री तथा उपभोगमा प्रतिबन्ध

काठमाडाैँ– बाँकेमा बुधबार रक्सी बिक्री वितरण तथा उपभोग गर्न नपाइने भएको छ। बडादशैँको भोलिपल्ट बुधबारका दिन निस्कने दुर्गा मूर्ति विसर्जन र्‍यालीलाई सभ्य, शान्त, अनुशासित एवम् मर्यादित बनाउन जिल्ला प्रशासन कार्यालय बाँकेले मंगलबार एक सूचना जारी गर्दै मदिरा बिक्री वितरण तथा उपभोगमा प्रतिबन्ध लगाएको हो।

बाँकेका प्रमुख जिल्ला अधिकारी श्रवणकुमार पोखरेलले जारी गरेको सूचनामा बुधबार बिहान ८ बजेदेखि राति १२ बजेसम्म मदिराजन्य पदार्थको ओसारपसार, बिक्री वितरण तथा उपभोग निषेध गरिएको उल्लेख छ। जिल्लाको समग्र शान्ति सुरक्षा, सुव्यवस्था र सार्वजनिक हितलाई ध्यानमा राखेर एक दिनका लागि पूर्णरूपमा जाँडरक्सी खान र बेच्न प्रतिबन्ध गरेको कार्यालयले जनाएको छ।

सूचनाको बर्खिलाप हुने गरी कुनै गतिविधि भएमा कानून बमोजिम कारबाही गरिने सूचनामा उल्लेख छ। प्रशासन कार्यालयले दुर्गा मूर्ति विसर्जनका लागि समयसीमा समेत निर्धारण गरेको छ। दुर्गा भवानीको मूर्ति विसर्जन र्‍याली अत्यन्तै मर्यादित, अनुशासित, शान्त एवम् शौम्य तुल्याउन साँझ ५ बजेअघि नै मूर्ति विसर्जन कार्य सम्पन्न गर्न स्थानीय प्रशासनले अनुरोध गरेको छ।

बाँकेमा बडादशैँको भोलिपल्ट जिल्लाका विभिन्न स्थानबाट दुर्गा भवानीको मूर्ति पवित्र जलकुण्ड र नदी तथा घाटमा विसर्जन गर्ने परम्परा छ। 

प्रतिक्रिया दिनुहोस !