जिल्लाबाहिर जान हुम्लावासीलाई सास्ती, पहुँचका भरमा हवाई टिकट बाँडेको गुनासो

हुम्ला– राष्ट्रिय सडक सञ्जालसँग नजोडिएको हुम्लामा सेवा दिँदै आएका निजी एयरलाइन्सले मनपरी टिकट वितरण गर्दा यात्रुले सास्ती खेप्नु परेको छ। 

नेपालगन्जबाट उडान गर्दै आएको सीता एयरलाइन्सले मंगलबार दुई उडान भरे पनि दोस्रो फ्लाइटको टिकट मनपरी वितरण गरेको यात्रुको गुनासो छ। पहिलो उडान नेपालगन्ज गरेर विकट जिल्ला हुम्लाको सिमकोट विमानस्थलमा पुगे पनि एयरलाइन्सका कर्मचारीले फोन र फेसबुक म्यासेन्जरमार्फत टिकट वितरण गरेको यात्रु बताउँछन्। 

पहिलो फ्लाइटको टिकट सबैलाई मिलाएर वितरण गरे पनि दोस्रो फ्लाइटको टिकट कर्मचारीले मनपरी वितरण गरेको आरोप छ। एक हप्तादेखि टिकटका लागि सिमकोट विमानस्थलमा पुगे पनि फोनका आधारमा पहुँचवालाले मात्रै टिकट पाउने गरेको यात्रु राजबहादुर परियार बताउँछन्। निजी एयरलाइन्सले नियमविपरीत उडान गर्दा सबैभन्दा बढी विद्यार्थी मर्कामा परेको उनको भनाइ छ। कर्णाली प्रदेशको सुर्खेतमा कात्तिक १८ गते हुने अध्यापन अनुमतिपत्रको परीक्षा दिन जाने विद्यार्थी बढी मर्कामा परेको परियार बताउँछन्।

यस्तै, खार्पुनाथ गाउँपालिका–३ का हस्ता रावल सिमकोट विमानस्थलमा टिकटका लागि गत हप्तादेखि धाए पनि नपाएको गुनासो गर्छन्। निजी एयरलाइन्सका कर्मचारीले टिकटका लागि धाउँदा सामान्य सर्वसाधारणको कुरा नै नसुन्ने गरेको उनी बताउँछन्।

सुर्खेत र नेपालगन्जबाट नियमित उडान गर्ने सहमति गरेका सीता, तारा, र समिट एयरलाइन्सले उडान नगर्दा यात्रुलाई टिकट पाउन मुस्किल भएको हो। समिट एयरलाइन्सले दैनिक नियमित एक उडान भरेको अन्य सीता तथा तारा एयरलाइन्सले पछिल्ला केही दिनयता फाट्टफुट्ट उडान भरे पनि मनपरी टिकट वितरण गर्ने गरेको यात्रुको गुनासो छ। 

नेपाल एयरलाइन्सले गत शुक्रबार, शनिबार र आइतबार उडान भरेको थियो। तीनचार दिनको अन्तरालमा एक उडान गर्ने निजी जहाजले कोठाबाटै र फोनका आधारमै टिकट बाँडफाँट गर्ने गरेको सिमकोट विमानस्थलमा भेटिएका साधारण बताउँछन्।

जिल्लाका तल्लो क्षेत्रका बासिन्दा बाहिर जान सिमकोट पुगे पनि टिकट पाउन समस्या हुनाका साथै टिकटको पैसा होटलमा बास बसेर खाना खाँदैमा जाने गरेको गुनासो यात्रु रावलको छ। दशैँ मनाएर जिल्लाबाहिर जाने यहाँका नागरिकलाई सास्ती भएको छ। बिहान ६ बजेदेखि विमानस्थलमा टिकटका लागि लाइन लागे पनि टिकट पाउन मुस्किल भएको उनी बताउँछन्।

सुर्खेतभन्दा नेपालगन्ज जान हुम्लाबाट उडान अझ महँगो रहेको छ। त्यस्तै, नेपालगन्ज जाँदा नौ हजार ११५ तिर्नुपर्छ। दशैँ मनाउन हुम्ला पुगेका विद्यार्थी, रोजगारीको सिलसिलामा जिल्लाबाहिर बस्दै आएका नागरिक तथा बिरामीलगायतलाई जिल्लाबाहिर फिर्ता हुन समस्या छ।