‘गत वर्ष ६ लाख रुपैयाँ आम्दानी, यसपाली कागती बोटमै’

स्याङ्जा– स्याङ्जामा किसानले उत्पादन गरेको कागतीले यस वर्ष उचित बजार पाउन सकेको छैन।

वालिङ नगरपालिका–१४ अमलडाँडाका यामप्रसाद पौडेलले गत वर्ष कागती बिक्री गरेर ६ लाख रुपैयाँ आम्दानी गरेका थिए। यसपाली बजार अभावका कारण कागती बोटमै छ। उनले हालसम्म बिक्री गर्न सकेका छैनन्। उत्पादन भएको कागतीले बजार नपाउँदा पौडेल चिन्तित छन्।

“गत वर्ष कागती बिक्रीबाट राम्रै आम्दानी भएको थियो”, उनले भने, “यस वर्ष सिजनमै  बजार पाउन सकेको छैन, बजार नपाएकै कारण कागती बोटमै छ।” 

बजार पाउन सकेमा तत्कालै झण्डै एक टनसम्म कागती बिक्री गर्न सकिने पौडेल बताउँछन्। “कसैले  बजार सुनिश्चित गरे एक टनसम्म कागती बिक्री गर्न सकिन्छ”, उनले भने। स्थानीय बजारमा दैनिक १०/१५ किलोमात्रै कागती खपत हुने गरेको उनले बताए। “दिनभर बजार डुलाउँदा मुश्किलले १०/१५ किलो मात्र बिक्री हुन्छ। बजार नपाउँदा दिक्क लागेको छ”, पौडेल भन्छन्।

पौडेलले स्याङ्जाका वालिङ, गल्याङ, बयरघारी, पुतलीबजारलगायत बजारका तरकारी पसल र होटलमा कागती बिक्री गर्दै आएका छन्। उनले २०७२ सालमा ‘पौडेल कागती फार्म’ दर्ता गरी पाँच रोपनीमा १५० कागतीका बोट लगाएका थिए। ‘सुन कागती २’ जातको कागतीका बेर्ना ल्याएर लगाएका पौडेलको अहिले दश रोपनी क्षेत्रफलमा ३०० कागतीका बोट छन्। 

आठ वर्ष पहिला विदेशबाट नेपालमा करोडौँ रुपैयाँको कागती आयात हुने गरेको सुनेर कागती खेतीमा होमीएको पौडेलको भनाइ छ। “शुरूका दिनमा पाँच रोपनी क्षेत्रफलमा एक सय पचास कागतीका बिरुवा लगाएँ”, उनले भने, “कागतीको उत्पादन र बजार राम्रो भएपछि पुनः पाँच रोपनी जग्गा किनेर फेरि १५० बिरुवा थपेँ।” शुरूमा लगाएका बोटले केही वर्षअघिदेखि उत्पादन दिँदै आएको र पछि लगाएको बोटले आगामी वर्ष फल दिने उनले बताए।

विगत वर्षमा कागतीलाई ग्रेडिङ गरी प्रतिकिलो १३० देखि २०० रुपैयाँसम्म बिक्री गर्ने गरिएको थियो। कागतीले बजार पाए यस वर्ष १२ लाख रुपैयाँसम्म आम्दानी गर्न सकिने पौडेलको विश्वास छ।

अन्य बाली लगाउँदा बाँदरको समस्या हुने गरेकाले व्यावसायिकरूपमा कागती खेती गरेको उनी बताउँछन्। कागती भण्डारण गर्न  शीतभण्डार नहुँदा पनि पौडेललाई समस्या भएको छ। “भण्डारण गर्न पाए पछि उचित मूल्य पाइन्थ्यो कि भन्ने लागेको छ,” उनले भने।