भूकम्पमा घाइते भएका ७ जनालाई काठमाडाैँ ल्याइयाे, त्रिवि शिक्षण अस्पतालमा उपचार हुँदै

काठमाडाैँ– जाजरकोट केन्द्रविन्दु भएर गएको भूकम्पमा परी घाइते भएकाहरूलाई थप उपचारका लागि चौरजहारीबाट काठमाडौँ ल्याइएको छ।

प्रहरी प्रवक्ता डीआईजी कुवेर कडायतले घाइते ७ जनालाई नेपाल वायुसेवा निगमको जहाजबाट काठमाडाैँ ल्याइएको जानकारी दिए। घाइतेहरूलाई त्रि.वि शिक्षण अस्पताल पुर्‍याइसकेको उनले बताए। 

उनका अनुसार भूकम्पमा परी अहिलेसम्म जाजरकोटमा एकसय र रूकुमपश्चिममा ३८ गरी जम्मा १३८ जनाको मृत्यु भएको छ। यस्तै, १६६ जना घाइते भएका छन्। उनका अनुसार जाजरकोटमा ८१ जना र रूकुममा ८५ जना घाइते भएका छन्। गम्भीर घाइते भएकाहरूलाई उपचारको लागि काठमाडाैँ ल्याइएको हो।

नेपाल प्रहरीले भूकम्प प्रभावित क्षेत्रमा राहत, उद्धार र खोजी कार्यका लागि ८५९ जना प्रहरी परिचालन गरिएको जनाएको छ भने आवश्यकता अनुसार थप प्रहरी परिचालनका लागि तयारी अवस्थामा राखिएको छ। यस्तै सशस्त्र प्रहरी तथा नेपाली सेना भूकम्प प्रभावित क्षेत्रमा खटिएका छन्।