शंखधर साख्वा इतिहासमा गर्व गर्न लायक राष्ट्रिय विभूति: प्रधानमन्त्री

पाटन– प्रधानमन्त्री पुष्पकमल दाहाल ‘प्रचण्ड’ले शंखधर साख्वा इतिहासमा गर्व गर्न लायक राष्ट्रिय विभूति भएको बताएका छन्। 

नेपाल संवत् ११४४ का अवसरमा मंगलबार ललितपुरमा आयोजित कार्यक्रममा बोल्दै प्रधानमन्त्री दाहालले सामाजिक न्याय भन्दै गर्दा शंखधर साख्वालाई बिर्सिन नसकिने बताए।

“उहाँले तत्कालीन समयमा ऋणमोचन गर्ने कामको नेतृत्व गरेर इतिहासमा कीर्तिमान कायम गर्ने काम गर्नुभयो। त्यो अभियानसँगै नेपाल संवत् जोडिएको छ,” उनले भने।

प्रधानमन्त्रीले दाहालले नेपाल संवत् ‘नेवार समुदायको मात्रै हो’ भन्ने भ्रम रहेको र यसलाई चिर्न आवश्यक रहेको बताए। नेपाल संवत्‌लाई राष्ट्रिय संवत्‌को रूपमा घोषणामा मात्रै सीमित नराखी सरकारी निर्णयमा पनि विक्रम संवत्‌सँगै नेपाल संवत् पनि उल्लेख गर्ने निर्णय मन्त्रिपरिषद्‌बाट गर्न पाउँदा गर्वको महसुस भएको उनले बताए।

भने, “यसले हाम्रो स्वतन्त्रता, समानता, सामाजिक न्यायसहितको राष्ट्रिय स्वाधीनता र हाम्रो आत्मसम्मानलाई फेरि एउटा उचाइमा उठाएको छ, यसमा सबै नेपालीले गर्व गर्नुपर्छ।” 

प्रधानमन्त्रीले वर्तमान सरकारले सामाजिक न्याय, सुशासन र समृद्धिको नारामा केन्द्रित रही उच्च प्राथमिकता साथ काम गर्दै आएको दाबी गरे।