बाजुरामा जिप दुर्घटना हुँदा एकको मृत्यु

बाजुरा– बाजुराको पूर्वी–उत्तरी भेगको कर्णाली करिडोरको धुलाचौरनजिकै बिहीबार दिउँसो जिप दुर्घटना हुँदा एक जनाको मृत्यु भएको छ भने एक घाइते भएका छन्। 

मृत्यु हुनेमा मुगु जिल्लाको खत्याड गाउँपालिका–९ का अन्दाजी २८ वर्षीय मदन सार्की रहेको जिल्ला प्रहरी कार्यालय बाजुराका प्रहरी निरीक्षक किशोरसिं ऐरीले जानकारी दिए। 

उनका अनुसार हिमाली गाउँपालिकाबाट कोल्टी आउँदै गरेको लु१ज ४८२९ नम्बरको बोलेरो जिप धुलाचौर बजारनजिकै दुर्घटना भएको थियो। सो दुर्घटनामा घाइते हुनेमा गौमुल गाउँपालिका–३ का अन्दाजी १९ वर्षीय वसन्त धामी रहेको प्रहरी निरीक्षक ऐरीले बताए। सो जिपमा चालकसहित चार जना सवार रहेका बताइएको छ।  

जिपका चालकसहित एक जना भने सकुशल रहेको प्रहरीले जनाएको छ। जीपचालक खत्याड –९ का दलबहादुर लावणलाई प्रहरीको नियन्त्रणमा लिइसकेको र घटनाबारे थप अनुसन्धान भइरहेको प्रहरीले जनाएको छ।