पद्मप्रसाद पाण्डे संसद्को कार्यवाहक महासचिव नियुक्त

काठमाडौँ– पद्मप्रसाद पाण्डे संघीय संसद्को कार्यवाहक महासचिव नियुक्त भएका छन्। 

सभामुख देवराज घिमिरेले बुधबार पाण्डेलाई कार्यवाहक महासचिव नियुक्ति गरेको उनको सचिवालयले जनाएको छ। 

प्रशासनिक नेतृत्व नहुँदा संघीय संसद् दिवसका सन्दर्भमा गर्नुपर्ने काममा प्रभाव परेको, लोक सेवाबाट सिफारिस भएर आएका कर्मचारीको नियुक्तिलगायतमा प्रभाव परेका कारण सभामुखले कार्यवाहक महासचिव तोकेको सचिवालयले स्पष्ट पारेको छ।   

यसअघि, संघीय संसद्का महासचिव भरतराज गौतमले राजीनामा दिएपछि सभामुख घिमिरे र राष्ट्रियसभा अध्यक्ष गणेशप्रसाद तिमिल्सिनाले महासचिवमा पाण्डेको नाम सिफारिस गरेका थिए। 

सभामुख र राष्ट्रिय सभाका अध्यक्षको सिफारिसमा राष्ट्रपतिले संसद्को महासचिव नियुक्त गर्ने कानुनी व्यवस्था छ। कार्यवाहक महासचिव तोक्ने अधिकार भने सभामुखलाई छ।

सभामुख घिमिरेले महासचिव नियुक्तिमा भएको ढिलाइ वा चासोबारे राष्ट्रपतिसँग संवाद गर्न चाहेको तर सम्पर्क नभएको पनि उनको सचिवालयले जनाएको छ।