अनुसन्धानले भन्छ– धूमपानले मस्तिष्कलाई खुम्चाउँछ

चुरोट स्वास्थ्यका लागि कति हानिकारक छ र धूमपानले मानिसको मुटु र फोक्सोमा कत्तिको हानि पुर्‍याउँछ भन्ने कुरा सबैलाई थाहा छ। यसले क्यान्सर पनि निम्त्याउन सक्छ। तर नयाँ अनुसन्धानले यसले मस्तिष्कमा पनि असर गर्ने बताएको छ।

‘बायोलोजिकल साइकियाट्री ग्लोबल ओपन साइन्स जर्नल’मा प्रकाशित अनुसन्धानले यस्तो निष्कर्ष  निकालेको हो। अनुसन्धानले धूमपानले मानव मस्तिष्कलाई स्थायी रूपमा संकुचित गर्न सक्ने र यसबाट हुने क्षति अपरिवर्तनीय हुने देखाएको छ। 

धूम्रपान छोड्दा मस्तिष्कको तन्तुलाई थप क्षति हुनबाट त रोक्न सक्छ तर, यसले मस्तिष्कलाई पहिलेको आकारमा ल्याउन नसक्ने पनि अनुसन्धानले देखाएको छ।

सेन्ट लुइसको ‘वाशिंगटन युनिभर्सिटी स्कूल अफ मेडिसिन’का अनुसन्धानकर्ताहरूले गरेको उक्त अध्ययनले धूमपान गर्नेहरूलाई उमेरसम्बन्धी मानसिक विकास र अल्जाइमर रोगको जोखिम किन बढी हुन्छ भनेर पनि बताउँछ। मानिसको मस्तिष्कको आकार उमेरसँगै स्वाभाविक रूपमा घट्ने भएकाले धूमपानले मस्तिष्कलाई समयभन्दा पहिले नै बुढ्याउँछ।

युनिभर्सिटीको मनोचिकित्सा विभागकी प्राध्यापक लौरा जे बेरुतले भनिन्, “हालसम्म वैज्ञानिकहरूले धूमपानले मस्तिष्कमा पार्ने असरलाई बेवास्ता गरेका थिए। हामीले फोक्सो र मुटुमा धूमपानका सबै भयानक प्रभावहरूमा ध्यान केन्द्रित गरेका थियौँ।”

उनले थपिन्, “तर हामीले मस्तिष्कलाई अझ नजिकबाट हेर्न थाल्यौँ, यो स्पष्ट भयो कि धूमपान तपाईंको दिमागको लागि साँच्चै हानिकारक छ।”

अनुसन्धानका लागि टोलीले ३२ हजार ९४ व्यक्तिको मस्तिष्कमा धूमपानको इतिहास र धूमपानको आनुवंशिक जोखिमको तथ्यांक विश्लेषण गरेको थियो। शोधकर्ताहरूले धूमपानको इतिहास र धूमपानको लागि मस्तिष्कको मात्राको आनुवंशिक जोखिमबीचको सम्बन्ध फेला पारेका छन्।

यसबाहेक, धूमपान र मस्तिष्कको आकारबीचको सम्बन्ध उसले सेवन गर्ने कुरामा निर्भर गर्दछ। एक व्यक्तिले दिनमा जति धेरै धूमपान गर्छ, उसको मस्तिष्कको आकार त्यति नै सानो हुने अध्ययनले देखाएको छ।