नेपाली खेलाडीलाई ४ स्वर्णसहित ११ पदक

काठमाडौँ– भारतको देहरादुनमा भएको सातौँ अन्तर्राष्ट्रिय तेक्वान्दो च्याम्पियनसिपमा नेपाली खेलाडीले ४ स्वर्णसहित ११ पदक जितेका छन्।

टोलीका व्यवस्थापकसमेत रहेका एसकेबीसीका तेक्वान्दो डोजाङका प्रिन्सिपल अरुणकुमार केसीले नेपाली खेलाडीले ४ स्वर्णका अलावा थप ३ रजत र ४ कास्य पनि जितेको जनाएका छन्। पुरुष ४५ केजीमुनि वृजेश रायमाझी, ३२ केजीमुनि रघुनाथ भण्डारी, ५० केजीमुनि सोफिक बराइली र ४५ केजीमुनि सुजित कार्कीले स्वर्ण जिते। 

आभास डिओले पुरुष ३२ केजीमुनि र एकल पुम्सेमा गरी दुई रजत जिते भने ३७ केजीमुनि सोहन तामाङले रजत हात पारे। पुरुष ४१ केजीमुनि क्षितिज घले, ५५ केजीमुनि अशिम घिमिरे, ३५ केजीमुनि दिप्सन थापा र एकल पुम्सेमा वृजेश रायमाझीले काँस्य पदक प्राप्त गरे। 

टोलीको प्रशिक्षकमा रन्जितबहादुर डगौरा छन्। सबै खेलाडी एसकेबीसी तेक्वान्दो डोजाङका हुन्। प्रतियोगितामा सहभागी भएर नेपाली टोली स्वदेश फर्किसकेको छ।