प्रधानमन्त्री कप महिला क्रिकेट शुरू हुँदै, पहिलो दिन ४ खेल

काठमाडौँ– प्रधानमन्त्री कप महिला राष्ट्रिय क्रिकेट प्रतियोगिता बिहीबार शुरू हुँदैछ।

नेपाल क्रिकेट संघ (क्यान) को आयोजनामा काठमाडौँस्थित कीर्तिपुर र मूलपानी रंगशालामा खेलहरू हुनेछन्। 

पहिलो दिन बिहीबार चार खेल हुँदैछन्। उद्घाटन खेल बिहान साढे ९ बजे बागमती र मधेशबीच त्रिवि मैदान कीर्तिपुरमा हुनेछ। 

सोही समयमा एपीएफ र सुदूरपश्चिमबीच मूलपानी मेदानमा खेल हुनेछ। यसैगरी, अर्को खेल दिउँसो १:१५ बजे गण्डकी र लुम्बिनीबीच कीर्तिपुरमा र कर्णाली र कोशीबीच मूलपानी मैदानमा खेल हुनेछ।

क्यानले यसअघि बुधबार एक कार्यक्रमबीच प्रतियोगिताको ट्रफी सार्वजनिक गरेको थियो। १४ दिनसम्म चल्ने प्रतियोगितामा सात प्रदेश र विभागीय टोली एपीएफसहित आठ टोली सहभागी छन्। 

क्यानले प्रतियोगिता पहिलो पटक सिंगल राउन्ड रोबिनका आधारमा सञ्चालन गर्न लागेको हो।