इलाममा बढ्यो धान उत्पादन, खेतीको क्षेत्रफल भने घट्यो

फिक्कल– इलाममा यस वर्ष धान उत्पादन बढेको छ। यस वर्ष गत वर्षको तुलनामा तीन मेट्रिक टन बढी धान उत्पादन भएको कृषि ज्ञान केन्द्र इलामका प्रमुख टोनी बर्देवाले जानकारी दिए। 

उनका अनुसार यस वर्ष ४९ हजार ८२ मेट्रिक टन धान उत्पादन भएको छ। गत वर्ष ४९ हजार ७९ मेट्रिक टन उत्पादन भएको थियो। तर, गत वर्षभन्दा यस वर्ष धान रोपाइँ हुने क्षेत्रफल भने घटेको छ। गत वर्ष १४ हजार ८१५ हेक्टर क्षेत्रमा धान लगाइएकामा यस वर्ष १४ हजार ८१० हेक्टर क्षेत्रमा मात्र धान लगाइएको थियो।

गत वर्ष धानको उत्पादकत्व प्रतिहेक्टर ३.३१ मेट्रिक टन थियो। यस वर्ष बढेर प्रतिहेक्टर ३.३२ मेट्रिक टन पुगेको छ। परम्परागत कृषि प्रणालीमा सुधार गरी आधुनिक कृषि प्रणालीको प्रयोगसँगै मल, बीउबिजन र सिँचाइको उचित व्यवस्थापनले धान उत्पादन बढेको प्रमुख बर्देवाको भनाइ छ। 

“हामीले किसानलाई विभिन्न मेसेरेनरी सामग्री तथा यन्त्र उपकरण अनुदानमा दिएका छौँ। यसले आधुनिक कृषि प्रणालीमा सहयोग पुर्‍याएको छ,” उनले भने, “उहाँहरूले पनि उन्नत बीउबिजनको प्रयोग गर्नुभयो। मल र सिँचाइको समेत व्यवस्थापन गर्नुभयो। यसर्थ क्षेत्रफल घटे पनि उत्पादनमा वृद्धि भएको हो।”

इलाममा रन्जित, राधा–४, चुल्ठे र अन्य स्थानीय जातका धानखेती गरिन्छ। जिल्लाको चुलाचुली गाउँपालिका र माई नगरपालिका एवं माङसेबुङ, सन्दकपुर र माईजोगमाई गाउँपालिकाको तल्लो क्षेत्रमा बढी मात्रामा धान उत्पादन हुने कृषि ज्ञान केन्द्रका प्रमुख बर्देवाले जानकारी दिए। 

यसैगरी कोदोमा पनि उत्पादकत्व बढेको छ। गत वर्ष प्रतिहेक्टर १.२० मेट्रिक टन कोदो उत्पादन भएकामा यस वर्ष प्रतिहेक्टर १.२१ मेट्रिक टन कोदो उत्पादन भएको छ। यस वर्ष एक हजार ५८० हेक्टर क्षेत्रमा कोदोखेती गरिएकामा एक हजार ९१५ मेट्रिक टन उत्पादन भएको छ। 

गत वर्ष एक हजार ५९६ हेक्टर क्षेत्रमा कोदोखेती गरिएकामा एक हजार ९१६ मेट्रिक टनमात्र कोदो उत्पादन भएको थियो।