वैदेशिक व्यापार: निरन्तर घट्दो क्रममा निर्यात

काठमाडौँ– गत आर्थिक वर्षको पाँच महिना (साउन–मंसिरसम्म)को तुलनामा चालु आर्थिक वर्षको पाँच महिनामा आयात र निर्यात दुवै घटेको छ। 

भन्सार विभागको तथ्यांकअनुसार चालु आर्थिक वर्षको पाँच महिनामा ६ खर्ब ४२ अर्ब २० करोड ७४ लाख रुपैयाँ बराबरको वस्तु आयात भएको छ। गत आर्थिक वर्षको सोही अवधिमा भने ६ खर्ब ६४ अर्ब ७४ करोड रुपैयाँको वस्तु आयात भएको थियो। यो गत आर्थिक वर्षको सोही अवधिको भन्दा ६.०९ अर्थात् ४ अर्ब ९ करोड रुपैयाँले कम हो।

आयात घट्दा मुलुकको व्यापार घाटामा पनि गत वर्षको तुलनामा केही सुधार देखिएको छ। मंसिरसम्म आइपुग्दा व्यापार घाटा ५ खर्ब ७९ अर्ब पुगेको छ। जुन २०७९/८० को पाँच महिनाको तुलनामा ३.०९ प्रतिशत अर्थात् १८ अर्ब ४४ करोडले कम हो। 

नेपालको कुल वैदेशिक व्यापारमा आयातको हिस्सा ९१.०४ प्रतिशत छ भने निर्यातको हिस्सा ८.९६ प्रतिशत छ।

यो अवधिमा सबैभन्दा धेरै ५३ अर्ब ९० करोड ३२ लाख रुपैयाँको डिजेल आयात भएको छ। २८ अर्ब ५५ करोड बराबरको पेट्रोल र २० अर्ब ६५ करोड बराबरको एलपी ग्यास आयात गरिएको हो। 

यस्तै, १३ अर्ब ६० करोडको स्मार्टफोन र करिब १० अर्ब रुपैयाँ बराबरको सुन आयात गरिएको छ। मुलुकबाट सबैभन्दा बढी ४ अर्ब ५३ करोड रुपैयाँ बराबरको गलैँचा र ३ अर्ब ९ करोड रुपैयाँ बराबरको अलैँची निर्यात भएको छ।