एमालेले मध्यपहाडका समस्या र माग सम्बोधनका लागि पहल गर्ने

काठमाडौँ– नेकपा एमाले अध्यक्ष एवं पूर्वप्रधानमन्त्री केपी शर्मा ओलीले मध्यपहाडी (पुष्पलाल) लोकमार्गकेन्द्रित आफ्नो ‘समृद्धिका लागि संकल्प यात्रा’का क्रममा देखिएका समस्या र मागहरूको अध्ययन, विश्लेषण गरी सम्बोधनका लागि पहल गर्ने जानकारी दिएका छन्।

एमालेले मध्यपहाडी लोकमार्गकेन्द्रित आफ्नो ‘समृद्धिका लागि संकल्प यात्रा’का उपलब्धिलाई आइतबार पार्टी कार्यालय ललितपुरमा सार्वजनिक गर्ने क्रममा सञ्चारकर्मीका प्रश्नको जवाफ दिँदै उनले भने, “समस्याका ती विषय राज्यको जुन तह–संघीय, प्रादेशिक या स्थानीय तहसँग सम्बन्धित छ, त्यहाँ बुझाउने छौँ। तिनको समाधानका लागि सम्बन्धित निकायसँग ध्यानाकर्षण र पहल गर्नेछौँ।”

उनले मध्यपहाडको विकास र समृद्धिसम्बन्धी ठोस परियोजना सार्वजनिक गर्ने बताए। “यस क्रममा हामी विज्ञहरू, जनप्रतिनिधिहरू र अन्य आवश्यक पक्षसँग सघन छलफल गर्नेछौँ, गहन अध्ययन गर्नेछौँ। हाम्रो संकल्प छ– हामी पहाडी भूभागलाई समृद्धिको केन्द्र बनाउने छौँ,” अध्यक्ष ओलीले भने।

बैतडीको झुलाघाटबाट गत मंसिर १४ गते शुरू भएको उक्त यात्रा यही पुस १ गते पाँचथरको चिवाभञ्ज्याङमा पुगेर समापन भएको थियो। ‘सम्बन्ध स्थानीय, सन्देश राष्ट्रिय’को मर्म एवं भावना अनुरूप उक्त अभियानका अभियानमा ३० जिल्ला हुँदै दुई हजार किलोमिटरभन्दा यात्रा गर्दै जनसभा, कोणसभा, साना भेला र जमघट, सर्वदलीय र सर्वपक्षीय बैठकहरू, सांस्कृतिक कार्यक्रम र अन्तरक्रियाहरूका माध्यमबाट लाखौँ नागरिकसँग प्रत्यक्ष भेटघाट र संवाद गरिएको एमालेले जनाएको छ।