टर्कीको अवरोध हटे स्विडेनले नाटोको सदस्यता पाउने

स्वीडेनले उत्तर उत्तर एटलान्टिक सन्धि संगठन (नाटो)को सदस्यता पाउने सम्भावना बढेको छ। अहिलेसम्म टर्कीका कारण यो सम्भव भइरहेको थिएन। 

समाचार एजेन्सी एपीका अनुसार मंगलबार टर्की संसद्को एक समितिले नेटोमा सामेल हुने स्विडेनको प्रस्तावलाई अनुमोदन गरेको छ। यो प्रस्ताव राष्ट्रपति रेसेप तैयप एर्दोगानको सरकारले राखेको थियो ।

“यो स्विडेनका लागि ठूलो सफलता हो। अब स्विडेनले टर्कीको महासभाबाट पनि सहयोगको अपेक्षा गरेको छ। यसको प्रक्रिया कहिले शुरू हुने भनेर घोषणा गरिएको छैन,” एपीले लेखेको छ। टर्की सरकारले करिब एक वर्षदेखि स्विडेनको नेटो सदस्यताको बाटोमा अवरोध खडा गर्दै आएको थियो। स्विडेनलाई नेटोमा समावेश गर्ने अभियानले करिब ६ महिनाअघि गति लिएको थियो र त्यसमा अमेरिकाको महत्त्वपूर्ण भूमिका थियो।

नाटोका महासचिव जेन्स स्टोल्टनबर्गले जुलाईमा लिथुआनियाको भिल्नियसमा नेटो शिखर सम्मेलनको क्रममा स्विडेन र टर्कीका नेतासँग भेटेका थिए । यसपछि एक संयुक्त वक्तव्यमा स्विडेनका प्रधानमन्त्री क्रिस्टर्सनले भनेका थिए– स्विडेनका लागि यो राम्रो दिन हो।

नाटो सदस्यताको बदलामा, स्वीडेनले युरोपेली संघ (ईयू)मा सामेल हुने टर्कीको प्रयासलाई समर्थन गर्नेछ। एर्डोगानले स्विडेनको सदस्यताको बारेमा भनेका थिए कि ‘स्विडेनको नाटो प्रस्तावलाई टर्कीको संसद्ले अनुमोदन गर्नुअघि ईयूले उनीहरूलाई सदस्य बनाउनुपर्छ। 

टर्कीले पनि स्विडेनको सदस्यतामार्फत लडाकु विमान उपलब्ध गराउन अमेरिकालाई दबाब दिइरहेको केही विज्ञको भनाइ छ।