साफ यू१९ महिला च्याम्पियनसिप: नेपालको पहिलो खेल बंगलादेशसँग

काठमाडौँ– साफ यू१९ महिला च्याम्पियनसिप २०२४ को खेल तालिका सार्वजनिक भएको छ। दक्षिण एशियाली फुटबल महासंघ (साफ) ले बंगलादेशको राजधानी ढाकामा फेब्रुअरी २ देखि ८ सम्म आयोजना हुने खेलको तालिका सार्वजनिक गरेको हो।

तालिका अनुसार उद्घाटन खेलमा बंगलादेश र नेपाल भिड्नेछन्। नेपालले दोस्रो खेल फ्रेबुअरी ४ मा भुटान र अन्तिम खेल भारतसँग फ्रेबुअरी ६ मा खेल्ने छ। 

प्रतियोगितामा आयोजक बंगलादेशसँगै नेपाल, भारत र भुटान गरी ४ टोलीको सहभागिता रहनेछ। प्रत्येक टोलीले ३/३ खेल खेल्नेछन् र शीर्ष दुई टोली फाइनलमा पुग्ने छन्। फाइनल खेल फेब्रुअरी ८ मा हुनेछ।

सन् २०१८ मा साफ यू१८ मा नेपाल उपविजेता बनेको थियो। उक्त प्रतियोगिताको उपाधि भिडन्तमा नेपाल बंगलादेशसँग १–० गोल अन्तरले पराजित भएको थियो। उक्त प्रतियोगितामा ६ टोली सहभागी थिए। २०२१ मा साफ यू१९ को नाममा प्रतियोगिता हुँदा नेपाल तेस्रो भएको थियो। त्यतिबेला ५ राष्ट्रको सहभागिता थियो।

२०२२ मा पुन: साफ यू१८ को नाममा प्रतियोगिता हुँदा नेपाल तेस्रो भएको थियो। उक्त प्रतियोगिता नेपाल, भारत र बंगलादेशले मात्रै सहभागिता जनाएका थिए। 

गत संस्करणमा भने ४ राष्ट्रले सहभागिता जनाउँदा नेपाल उपविजेता बनेको थियो। फाइनल खेलमा नेपाल घरेलु टोली बंगलादेशसँग ३–० गोल अन्तरले पराजित भएको थियो।