बालकुमारी घटना छानबिन गर्न पूर्वन्यायाधीश पौडेल नेतृत्वको उच्चस्तरीय आय‍ोग गठन

काठमाडाैँ– सरकारले ललितपुरको बालकुमारीमा भएको घटनाको छानबिन गर्न तीन सदस्यीय उच्च स्तरीय छानबिन आयोग गठन गरेको छ।

सोमबार बिहान सिंहदरबारमा बसेको राज्य व्यवस्था समितिको बैठकले उच्च अदालतका पूर्वन्यायाधीश शेखर पौडेलको अध्यक्षतामा आयोग गठन गरेको हो। जाँचबुझ आयोग ऐन, २०२६ को व्यवस्था अनुसार आयोग गठन गरिएको हो।

आयोगको सदस्यमा पूर्वएआईजी अरुण बिसी र गृह मन्त्रालयका सहसचिव नारायणप्रसाद भट्टराई रहेको सरकारका प्रवक्ता एवं सञ्चार तथा सूचना प्रविधिमन्त्री रेखा शर्माले बताइन्। उनले घटनामा भएको मानवीय, भौतिक लगायतका अन्य क्षतिको विवरण अध्ययन विश्लेषण गर्ने, उक्त घटनाको कारण र उक्त स्थानमा गरिएको सुरक्षा योजनाको अध्ययन गरी त्यसमा भएका कमी कमजोरी पहिचान गर्ने, बालकुमारी घटनासँग सम्बन्धित व्यक्ति, पदाधिकारी एवं निकायको भूमिकाका बारेमा अध्ययन गर्ने र दोषी देखिएको जो कोहीलाई पनि कारबाहीको सिफारिस गर्ने बताइन्।

प्रवक्ता शर्माले आयोगलाई एक महिनाको कार्यादेश दिइएको आयोगको सुझावसहितको प्रतिवेदनपछि सरकारले आवश्यक कदम चाल्ने बताउनु भयो ।