वीरगन्जबाट पोखरा गइरहेको बस दुर्घटना: ३२ यात्रु घाइते

दमौली– पृथ्वीराजमार्गअन्तर्गत तनहुँको म्याग्दे गाउँपालिका–६ मौरीबजारमा यात्रुवाहक बस दुर्घटना हुँदा ३२ जना घाइते भएका छन्।

वीरगन्जबाट पोखरा जाँदै गरेको बागमती प्रदेश ०३–००१ ख १२०६ नम्बरको बस बिहीबार बिहान खोलामा खसेको थियो।  

घाइतेमध्ये एक जनाको अवस्था गम्भीर रहेको तनहुँका डीएसपी मोहनबहादुर खाणले जानकारी दिए। १७ जनाको अवस्था मध्यम र १४ जनाको अवस्था सामान्य रहेको उनको भनाइ छ।

घाइते हुनेमा बसचालक कास्कीको अन्नपूर्ण–६ लुम्लेका ३४ वर्षीय अन्तिम सुनार, सहचालक तनहुँको शुक्लागण्डकी–६ खैरेनीटारका ३२ वर्षीय सागर श्रेष्ठसहित अन्य यात्रु छन्।