तराईमा बिहानैदेखि हुस्सु, कोशी, गण्डकी र कर्णालीको हिमाली भूभागमा हिमपातको सम्भावना

 

काठमाडौँ– नेपालमा पश्चिमी वायुको आंशिक प्रभाव रहेको छ। 

जसका कारण कोशीको पहाडी भूभागमा आंशिक बदली रहेको मौसम पूर्वानुमान महाशाखाले जनाएको छ। तराईका अधिकांश भूभागमा बिहानैदेखि हुस्सु र कुहिरो लागेको छ।

दिउँसो, गण्डकी, लुम्बिनी, कर्णाली, सुदूरपश्चिम र कोशीको पहाडी भूभागमा आंशिक बदली रहनेछ। कोशी, गण्डकी र कर्णालीको उच्च पहाडी तथा हिमाली भूभागमा हल्का हिमपातसमेत हुनेछ। 

यसैगरी, लुम्बिनी, कर्णाली, सुदूरपश्चिम र कोशीको पहाडी भूभागमा राति पनि आंशिक बदली हुनेछ। यी प्रदेशको उच्च पहाडी तथा हिमाली भूभागमा हल्का हिमपातको सम्भावना छ।

देशभर चिसो बढेकाले आवश्यक सावधानी तथा सतर्कता अपनाउन महाशाखाले अनुरोधसमेत गरेको छ।