प्रधानमन्त्री कप : गण्डकीको लगातार दोस्रो पराजय

काठमाडौँ– गण्डकी प्रदेशले प्रधानमन्त्री कप एक दिवसीय क्रिकेट प्रतियोगितामा लगातार दोस्रो पराजय बेहोरेको छ। शनिबार भएको पहिलो खेलमा लुम्बिनी प्रदेशसँग ४ विकेटले पराजित भएको गण्डकी दोस्रो खेलमा कर्णालीसँग ७ विकेटले पराजित भएको हो।

गण्डकीले दिएको १२३ रनको लक्ष्य पछ्याएको कर्णालीले ३३.२ ओभरमा ३ विकेट गुमाउँदै १२६ रन बनायो। कर्णालीको जितमा हिमान्शु शाहीले अविजित रहँदै सर्वाधिक ५३ रन बनाए। उनले ७१ बलमा ५ चौका र २ छक्का प्रहार गरे।

ओपनर निश्चल रावलले ८२ बलमा ३ चौकासहित २९ रन बनाए। उनी पनि अविजित रहे। अर्का ओपनर तथा कप्तान रवीन्द्र शाहीले २० रन बनाउँदा अर्जुन घर्ती १० रनमा अविजित रहे। विपिन शाही भने ६ रनमा पेभिलियन फर्किए।

गण्डकीका अंकित न्यौपानेले सर्वाधिक २ विकेट लिएर विपिन खत्रीको नाममा १ विकेट रह्यो।

त्यसअघि सिद्धार्थ क्रिकेट मैदान भैरहवामा टस हारेर पहिला ब्याटिङको निम्तो पाएको गण्डकीले निर्धारित ४५ ओभरमा ९ विकेट गुमाउँदै १२२ रन बनाएको थियो। खराब मौसमका कारण ५ ओभर खेलमा घटाइएको थियो।

गण्डकीले शुरूआत राम्रो गर्न सकेको थिएन। पहिलो पावरप्लेमा १६ रन बनाउँदा गण्डकीले ४ विकेट गुमाइसकेको थियो। गण्डकीका अमृत गुरुङ र कमल परियारले २१/२१ रन बनाए। अश्विन राना १६ र कप्तान विपिन खत्री १० रनमा आउट हुँदा चन्द्र पौडेल १४ रनमा अविजित रहे।

अन्य ब्याटरले भने दोहोरो अंकमा रन बटुल्न सकेनन्। कर्णालीका अनुज चनारा, दिनेश अधिकारी र दिपेन्द्र रावलले २/२ विकेट लिए।

प्रकाश जैशी, दिवन पुन र रवीन्द्र शाहीको नाममा १/१ विकेट रह्यो। कर्णालीको यो पहिलो खेल हो। जितसँगै कर्णालीले २ अंक जोडेको छ। कर्णाली चौथो स्थानमा छ। गण्डकी भने पाँचौँ स्थानमा छ।