त्रिशूलीमा जिप खस्यो, गोताखोरको टोलीले खोज्दै

चितवन– त्रिशूली नदीमा भारतीय नम्बरप्लेटको जिप खसेको छ। 

नारायणगढ–मुग्लिन सडकखण्डअन्तर्गत इच्छाकामना गाउँपालिका–५ स्थित तीन नम्बर पुल नजिकबाट उक्त जिप त्रिशूलीमा खसेको हो।

मंगलबार बिहान पौने पाँच बजे जिप त्रिशूलीमा खसेको चितवनका डीएसपी श्रीराम भण्डारीले जानकारी दिए। जिप सडकबाट करिब ८५ मिटर तल खसेको हो। 

जप खसेको सूचना पाएपछि विपद् व्यवस्थापन तालिम शिक्षालय कुरीनटारको गोताखोरको टोली परिचालन गरिएको छ। गोताखोरको टोलीले जिप पानीभित्र भेट्टाएको डीएसपी भण्डारीले बताए। उक्त जिपमा कति यात्रु सवार थिए भन्ने यकिन हुन सकेको छैन।