थाइल्यान्डको पटका कारखानामा विस्फोट हुँदा कम्तीमा २० जनाको मृत्यु

काठमाडाैँ– मध्य थाइल्यान्डमा एउटा पटका कारखानामा विस्फोट हुँदा कम्तीमा २० जनाको मृत्यु भएको छ। यस्तै दर्जनाैँ घाइते भएको न्यु योर्क टाइम्सले जनाएको छ।

स्थानीय उद्धार सेवाले साझा गरेको तस्वीरहरूमा जमिनमा धातुको फोहोर र कालो धुवाँको मुस्लो देखिएको छ। विस्फोट स्थानीय समयअनुसार बुधबार दिउँसो ३ बजे मध्य सुफान बुरी प्रान्तको साला खाओ टाउनसिप नजिक भएको हो। सुफान बुरी प्रान्तका गभर्नर नट्टापट सुवानप्रतिपले विस्फोटक अध्यादेश डिस्पोजल समूह (ईओडी)लाई उद्धृत गर्दै भनेका छन्, “हामीले ईओडी टोलीबाट २० जनाभन्दा धेरैको मृत्यु पुष्टि भएको रिपोर्ट प्राप्त गरेका छौँ।” विस्फोटका कारणबारे कुनै संकेत प्राप्त भएको छैन।

यद्यपि नट्टापटले के कारणले विस्फोट भएको हो भन्नेबारे अधिकारीहरूले अनुसन्धान गरिरहेको जानकारी दिए। “कारखाना वैध लाइसेन्सका साथ कानूनीरूपमा सञ्चालन भइरहेको थियो”, उनले भने। प्रहरी अधिकारीहरूका अनुसार छेउछाउका क्षेत्रमा कुनै क्षति भएको छैन। “विस्फोटबाट एउटा घरको सिसाको झ्याल फुटेको छ तर अन्य कुनै रिपोर्ट प्राप्त भएको छैन,” नट्टापटले भने।

लेफ्टिनेन्ट जनरल नैयावत फडेमचिडले घटनाबारे प्रधानमन्त्री श्रेथा थविसिनलाई जानकारी गराइएको बताए। प्रधानमन्त्री श्रेथा अहिले विश्व आर्थिक मञ्चका लागि स्विट्जरल्यान्डमा छन्।

थाइल्यान्डमा पटका र अन्य आतशबाजी उत्पादन गर्ने कारखानाहरूमा विस्फोट असामान्य होइन। गत वर्ष दक्षिणी नाराथिवाट प्रान्तको सुंगई कोलोक शहरमा एउटा आतशबाजीको गोदाममा विस्फोटपछि कम्तीमा १० जनाको मृत्यु भएको थियो।