बनेपा–९ का वडाध्यक्ष १५ लाख घुससहित पक्राउ

काठमाडौँ– काभ्रेको बनेपा नगरपालिका– ९ का वडाध्यक्ष नृपेश वादे १५ लाख रुपैयाँ घुस रकमसहित पक्राउ परेका छन्। 

अख्तियार दुरुपयोग अनुसन्धान आयोगको टोलीले बुधबार राति भक्तपुरको गठ्ठाघरबाट वादेलाई पक्राउ गरेको हो। 

अख्तियारका प्रवक्ता नरहरि घिमिरेका अनुसार वडाध्यक्ष वादेले घरबाटो सिफारिस गर्ने प्रयोजनको लागि सेवाग्राहीबाट १५ लाख रुपैयाँ घुस लिइसकेको अवस्थामा पक्राउ गरिएको हो। 

साथै, स्रोत नखुलेको १० हजार जापानीज ऐन, १०० अमेरिकी डलर, हुन्डाई आई टेन कार र कार चालक पदमबहादुर प्रधानलाई समेत नियन्त्रणमा लिएको अख्तियारले जनाएको छ।