लगातार दोस्रो दिन ओराल्यो लाग्यो शेयर बजार

काठमाडाैँ– शेयर बजार लगातार दोस्रो दिन बिहीबार पनि ओरालो लागेको छ। बुधबार दोहोरो अंकले घटेको शेयर बजार परिसूचक नेप्से आज ७.२४ अंकले घटेर २ हजार १५५.८२ विन्दुमा झरेको छ।

बिहीबार २९८ कम्पनीको २ करोड ११ लाख २५ हजार कित्ता शेयर ८ अर्ब १७ करोड ४९ लाख रुपैयाँमा कारोबार भएको छ।

फाइनान्स, हाइड्रोपावर र अन्यबाहेक सबै समूहको शेयर घटेको छ। बीमा, होटल तथा पर्यटन, उत्पादन तथा प्रशोधन, माइक्रोफाइनान्स समूहको शेयर उच्च अंकले ओरालो लागेको छ।

तेह्रथुम पावर कम्पनीको शेयर सबैभन्दा धेरै ९ प्रतिशतभन्दा धेरैले घटेको छ। समग्रमा बजार घटेको दिन रिडी पावर कम्पनी, सिनर्जी पावर डेभलपमेन्ट, माहुली लघुवित्त र गणपति लघुवित्तको शेयरमा सकारात्मक सर्किट लागेको छ।