एयरबसले भारतमा हेलिकप्टर ‘एसेम्बली लाइन’ खोल्ने

युरोपेली विमान निर्माता एयरबसले भारतीय समूह ‘टाटा’सँग मिलेर भारतमा हेलिकप्टर ‘एसेम्बली लाइन’ निर्माण गर्ने भएको छ।  

फ्रान्सका राष्ट्रपति इम्यानुएल म्याक्रोनको दुई दिवसीय भारत भ्रमणका क्रममा उक्त सम्झौताको घोषणा गरिएको हो। सो क्रममा राष्ट्रपति म्याक्रोनले एशिया–प्रशान्तमा धेरैभन्दा धेरै फ्रान्सेली साझेदारीमा जोड दिइएको जनाएका छन्। 

एसेम्बली लाइन स्थापना गर्न दुई वर्ष लाग्नेछ। भारतमा कुनै पनि निजी समूहले सञ्चालन गर्ने यो पहिलो अपरेसन हुने एयरबसले बताएको छ। यसले एच१२५ इक्युरियल हेलिकप्टरका प्रमुख घटकलाई एसेम्बल र परीक्षण गर्नेछ र भारत तथा छिमेकी मुलुकमा ग्राहकलाई हेलिकप्टर प्रदान गर्नेछ। 

भारतमा हेलिकप्टर बनाउँदा मुलुकमा हेलिकप्टरको बजारको वास्तविक क्षमता थाहा हुने एयरबसका प्रमुख कार्यकारी गुइलाउम फौरीले बताए। एच१२५ हलुका नागरिक हेलिकप्टर हो र यसले छ जनासम्म ओसारपसार गर्न सक्नेछ। 

सन् २०२१ मा एयरबसले टाटासँग मिलेर पश्चिमी भारतीय राज्य गुजरातमा सि२९५ सैन्य यातायात विमानका लागि एसेम्बली लाइन स्थापना गर्ने निर्णय गरेको थियो।