उच्च अदालत पाटनका न्यायाधीश मरासिनीको निधन

काठमाडौँ– पाटन उच्च अदालतका न्यायाधीश मातृकाप्रसाद मरासिनीको निधन भएको छ।

न्यायाधीश मरासिनीको मंगलबार बिहान हृदयाघातबाट निधन भएको उच्च अदालत पाटनका उपरजिस्ट्रार तीर्थराज भट्टराईले जानकारी दिए। घरमै हृदयाघात भएका उनलाई कलंकीको नेसनल अस्पताल लगिएको थियो। 

मरासिनी अघिल्लो साता मात्रै सरुवा भएर पाटन आएका थिए। लामो समय जिल्ला न्यायाधीश रहेका उनी पुस १८ मा उच्च अदालतको न्यायाधीशमा नियुक्त भएका थिए। 

उनको मंगलबार एकल इजलास र न्यायाधीश चन्द्रमणि ज्ञवालीसँगको संयुक्त इजलाससमेत तोकिएको थियो।