६ महिनामा ३ हजार ४५ लागुऔषध कारोबारी पक्राउ

काठमाडौँ– विगत ६ महिनामा ३ हजार ४५ जना लागुऔषध कारोबारी पक्राउ परेका छन्। चालु आर्थिक वर्षको साउनदेखि पुस मसान्तसम्म लागुऔषध प्रयोगकर्ता, कारोबारी र लागुऔषधसम्बन्धी अपराधमा संलग्न ३ हजार ४५ जनालाई पक्राउ गरिएको केन्द्रीय प्रहरी समाचार कक्षले जनाएको छ।

उक्त अवधिमा २ हजार ७५८ पुरुष र १४४ जना महिला, १३३ जना विदेशी पुरुष र १० जना विदेशी महिला पक्राउ परेका हुन्। यीमध्ये १ हजार ९६० मुद्दा दर्ता भएका छन्।

पक्राउ परेकाहरू गाँजा, चरेस, हेरोइन, अफिम, कोकिन आदि सेवन गर्ने तथा यसको अवैध ओसारपसारमा संलग्न रहेकाहरू हुन्। उनीहरूबाट ८ हजार ३२० किलो गाँजा, ३०८ किलो चरेस, १० किलो हेरोइन, २७ किलो अफिम र ३ किलो कोकिन सोही अवधिमा बरामद गरी नष्ट गरिएको समाचारकक्षले जनाएको छ।