उपत्यकाका उपप्रमुखले स्थानीय सरकार सञ्चालन ऐन संशोधनबारे साझा धारणा बनाउने

काठमाडौँ– काठमाडौँ उपत्यकाका स्थानीय तह उपप्रमुख र उपाध्यक्ष सञ्जालको बैठकले स्थानीय सरकार सञ्चालन ऐन, २०७४ को संशोधन मस्यौदा विधेयकलाई संशोधन गर्न माग गरेको छ। 

संघीय मामिला तथा सामान्य प्रशासन मन्त्रालयले सो ऐनको संशोधन विधेयको मस्यौदा तयार गरी सुझावका लागि प्रकाशित गरेको जनाइएको छ। प्रस्तावित सो संशोधन विधेयकमा सञ्जालले एउटै धारणासहित सुझाव मन्त्रालयलाई पठाउने तयारी गरेको छ। 

सञ्जालले स्थानीय सरकार सञ्चालन ऐन, २०७४ को संशोधन मस्यौदा विधेयक सबै पालिकामा नपुगेको जनाउँदै तत्काल पुर्‍याउन मन्त्रालयसँग माग गरेको छ। सोमबार चन्द्रागिरि नगरपालिकाको आतिथ्यतामा बसेको सञ्जालको सातौँ बैठकले सञ्जालका लागि आफ्नै  लोगो स्वीकृत गरी प्रयोगमा ल्याउने निर्णय गरेको छ। 

काठमाडौँ महानगरपालिकाका उपप्रमुख सुनिता डंगोलले स्थानीय सरकार सञ्चालन ऐन, २०७४ को संशोधन मस्यौदा विधेयकलाई संशोधन गर्न माग गर्दै संशोधन विधेयकसमेत महानगरपालिकामा प्राप्त नभएको गुनासो गरिन्। 

चन्द्रागिरि नगरपालिकाका उपप्रमुख वसन्ती श्रेष्ठले कुन– कुन क्षेत्रमा स्थानीय सरकार सञ्चालन ऐन, २०७४ को संशोधन मस्यौदा विधेयकलाई संशोधन गर्ने भन्ने विषयमा एकीकृत धारणा बनाउन सञ्जालको थप बैठक आवश्यक रहेको धारणा राखिन्। 

बैठकमा काठमाडौँ उपत्यकाभित्रका महानगर, नगर तथा गाउँपालिकाका उपप्रमुख तथा उपाध्यक्षको सहभागिता थियो।