मोरङका घरेलु उद्योगमा ३ लाखलाई रोजगारी

मोरङ– मोरङ जिल्लामा साना तथा घरेलु उद्योग महासंघअन्तर्गत ३० हजारभन्दा बढी उद्योग सञ्चालनमा रहेका तथा तिनमा ४५ अर्ब रुपैयाँ लगानी हुनाका साथै तीन लाखले रोजगारी पाएका छन्।

नेपाल घरेलु तथा साना उद्योग महासंघ मोरङको आगामी चैत ३ गते विराटनगरमा हुने  २५ औँ साधारण सभा र १२ औँ जिल्ला अधिवेशनका सन्दर्भमा बुधबार यहाँ आयोजित पत्रकार सम्मेलनमा अध्यक्ष चेतनाथ निरौलाले उक्त जानकारी दिएका हुन्। अधिवेशनमा जिल्लामा उत्पादित  कृषि, पशु, हस्तकला, स्थानीय उत्पादित विभिन्न  वस्तुहरु, चिया, छुर्पी, ढाकाका कपडा, जुत्ता, चप्पल, सौन्दर्य सामग्रीसहित  एक दिवसीय प्रदर्शनीको आयोजना गरिने छ।

अध्यक्ष निरौलाले जिल्लाका घरेलु उद्योगको प्रोत्साहनका लागि नेपाल सरकार र प्रदेश सरकारले  प्रविधि हस्तान्तरण कार्यक्रमअन्तर्गत पाँच लाख रुपैयाँ, लघु, घरेलु तथा साना उद्योग प्रवर्द्धन केन्द्र काठमाडाैँमार्फत अनुदानमा आधारित प्रविधि हस्तान्तरण कार्यक्रममा २० लाख रुपैयाँ उपलब्ध गराएको जानकारी दिए।