गाजामा हवाईमार्गबाट राहत सामग्री पुर्‍याउने बाइडेनको घोषणा

अमेरिकी राष्ट्रपति जो बाइडेनले गाजामा हवाईमार्गबाट राहत सामग्री पुर्‍याउन शुरू गरिने बताएका छन्। 

ह्वाइट हाउसमा इटालीका प्रधानमन्त्री जियोर्जिया मेलोनीसँगको भेटको क्रममा बाइडेनले गाजा युद्धबारे भने, “अझै धेरै राहत सामग्री पुर्‍याउने काम गर्न आवश्यक छ र अमेरिकाले यसमा अग्रसरता लिनेछ।” 

अक्टोबर ७ मा हमासले इजरायलमाथि गरेको आक्रमणपछि गाजामा मानवीय संकट उत्पन्न भएको र इजरायल र हमासबीच युद्धविरामका लागि वार्ता जारी रहेका बेला यो घोषणा गरिएको हो।

बाइडेनले इजरायललाई नागरिक हताहत कम गर्न र सहायताको अनुमति दिन दबाब दिएका छन्। मुस्लिम धर्मावलम्बीको पवित्र महिना रमजानमा ६ हप्ताका लागि युद्धविराम गर्ने सहमति हुने उनले आशा व्यक्त गरे। 

यसैबीच, संयुक्त राष्ट्रसंघले अनिकालको चेतावनी दिएको उत्तरी गाजामा सहायता लिएर गएका ट्रक वरपर भेला भएका १०० भन्दा बढी प्यालेस्टिनीको मृत्यु भएको बिहीबारको घटनापछि युद्धविराम वार्ता जटिल बनेको छ ।

निर्दोष मानिसहरू भयानक युद्धमा फसेका आफ्नो परिवारको पेट पाल्न नसकिरहेका र सहायताका लागि भेला भएका प्यालेष्टिनीको ज्यानसम्म जाने स्थिति दुःखद भएको बाइडेनले बताए।