पूर्वसभामुख महरालाई कारबाही गर्न गृहमन्त्रीको निर्देशन

काठमाडौँ– उपप्रधान एवं गृहमन्त्री रवि लामिछानेले सुन तस्करी प्रकरणमा माओवादी केन्द्रका उपाध्यक्ष तथा पूर्वसभामुख कृष्णबहादुर महरालाई कारबाही गर्न निर्देशन दिएका छन्।

आइतबार बिहान गृहसचिव एकनारायण अर्याल, प्रहरी महानिरीक्षक वसन्तबहादुर कुँवर र केन्द्रीय अनुसन्धान विभाग (सीआईबी)का प्रमुख श्याम ज्ञवालीलाई मन्त्रालयमा बोलाएर उक्त निर्देशन दिएका हुन्। 

सुन तस्करीसम्बन्धी छानबिन गर्न गठित उच्चस्तरीय जाँचबुझ आयोगले पूर्वसभामुख महरालाई कारबाही गर्न सिफारिस गरेको थियो। उनका छोरा राहुल विद्युतीय चुरोट (भेप)मार्फत भएको सुन तस्करी प्रकरणमा पुर्पक्षका लागि थुनामा छन्।

छलफलका क्रममा गृहमन्त्री लामिछानेले महरासहित प्रतिवेदनले औँल्याएका निजामती तथा प्रहरी कर्मचारीलाई पनि कारबाही गर्न प्रहरी नेतृत्वलाई निर्देशन दिएको उनको सचिवालयले जनाएको छ।